ގެދޮރުވެރިޔާ ސްކީމްގައި ހިމެނޭ 4000 ފްލެޓް ހަވާލުކުރުމުގެ ކަންކަން ކުރިއަށްދާނީ ހައުސިން މިނިސްޓްރީން ވަކިގޮތެއް އެންގުމުން ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ބުނެފިއެވެ.
އެފްޑީސީން މިއަދު ނެރުނު ނޫސްބަޔާނެއްގައި ބުނެފައިވަނީ، ގެދޮރުވެރިޔާ ސްކީމްގެ ދަށުން ހުޅުމާލޭގެ ދެވަނަ ފިޔަވަހީގައި ތަރައްގީ ކުރަމުންދާ 4000 ހައުސިން ޔުނިޓް މަޝްރޫއުގެ ދަށުން ދޫކުރުމަށް ހަމަޖެހިފައިވާ ޔުނިޓްތަކުގެ އެއްބަސްވުމާއި ޔުނިޓް ހަވާލުކުރުމާ ބެހޭގޮތުން ގިނަ ފަރާތްތަކަކުން މައުލޫމާތު ހޯދުމަށް ހުށަހަޅަމުންދާ ކަމަށެވެ.
އެފްޑީސީން ބުނެފައިވަނީ 4000 ފްލެޓް ލިބޭނެ ފަރާތްތަކާއި އެފަރާތްތަކަށް ލިބޭނެ ޔުނިޓެއް ކަނދައެޅުމުގެ މަސައްކަތަކީ ހައުސިން މިނިސްޓްރީން ކުރިއަށްގެންދާ މަސައްކަތެއް ކަމަށެވެ. އެހެންކަމުން ޔުނިޓް ހަވާލުކުރުމާ ގުޅޭ އެންމެހާ ކަންކަމުގައި އެފްޑީސީން އަމަލުކުރަމުންދާނީ ހައުސިން މިނިސްޓްރީން އަންގާ ގޮތަކަށް ކަމަށް ބުނެފައިވެއެވެ.
"މިނިސްޓްރީ އޮފް ހައުސިން، ލޭންޑް އެންޑް އާބަން ޑިވެލޮޕްމަންޓުން މީގެކުރިން ވަނީ ޔުނިޓް ހަވާލު ކުރުމާ ގުޅުންހުރި އެންމެހާ މަސައްކަތްތައް މަޑުޖައްސާލުމަށް މި ކޯޕަރޭޝަނަށް އަންގާފައެވެ." އެފްޑީސީން މިއަދު ބުނެފައިވެއެވެ.
އެހެންކަމުން 4000 ފްލެޓް ހަވާލުކުރުމާ ގުޅޭގޮތުން ކުރެވޭ އެންމެހާ މުއާމަލާތްތައް ކުރިއަށްގެންދެވޭނީ އެ މައްސަލައާ ގުޅޭގޮތުން ހައުސިން މިނިސްޓްރީން ވަކިގޮތެއް އެންގުމުން ކަމަށް އެފްޑީސީން ބުނެފައިވެއެވެ.