ކަންގަނާ ރަނާވަތު، އިންޑިއާގެ ކުރީގެ ބޮޑުވަޒީރު އިންދިރާ ގާންދީގެ ރޯލު ކުޅެފައިވާ ފިލްމު "އިމަޖެންސީ" އިން ލަވައެއް އާންމުކޮށްފި އެވެ.
މިއަދު އާންމުންނަށް ދޫކޮށްލި ލަވައިގެ ނަމަކީ "ސިންގާސަން ކާލީ ކަރޯ" އެވެ. ޖީވީ ޕްރަކާޝް ކުމާރުގެ މިއުޒިކަށް ހަދާފައިވާ މި ލަވަ ކިޔާފައި ވަނީ އުދިތު ނާރަޔަން އާއި ނަކަޝް އަޒީޒުގެ އިތުރުން ނަކުލް އަބިއަންކަރެވެ. ލަވައިގެ ޅެން ހެދީ މަނޯޖް މުޝްތަރިޝެވެ.
އަންނަ މަހުގެ 6 ގައި ރިލީޒްކުރަން ހަމަޖެހިފައިވާ "އިމަޖެންސީ" އަކީ އިންދިރާގެ ވެރިކަމުގެ ދައުރުގައި އިއުލާންކުރި ކުއްލި ހާލަތާ ގުޅިގެން ހޫނުވެގެން ދިޔަ ސިޔާސީ ދިލަގަނޑާއި ސިޔާސީ މަސްރަހަށް ބިނާކޮށް ހަދާފައިވާ ފިލްމެވެ. މި ފިލްމަކީ ކަންގަނާ ޕްރޮޑިއުސްކޮށް، ޑައިރެކްޓް ވެސް ކުރި ފިލްމެކެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "އިމަޖެންސީ" ގެ ކާސްޓްގައި އަނޫޕަމް ކޭރް، މަހީމާ ޗައުދަރީ، ޝްރެޔަސް ތަލްޕަޅޭ، މިލިންދު ސޯމަން، ވިޝާލް ނައިރް އަދި މަރުވެފައިވާ އެކްޓަރު ސަތިޝް ކޯޝިކް ހިމެނެ އެވެ.
މި ފިލްމު ބެލުންތެރިންނަށް ދޫކޮށްލަން ތައްޔާރުވާ އިރު، ކަންގަނާ އަކީ މިހާރު އިންޑިއާގެ ގާނޫނު ހަދާ މަޖިލީހުގެ ތިރިގެ، ލޯކް ސަބާގެ މެންބަރެކެވެ. އެއީ ވެރިކަން ކުރާ ބީޖޭޕީގެ މެންބަރެއްގެ ގޮތުގަ އެވެ.