ބީއެމްއެލް އިން ރުފިޔާ ކާޑުތަކުން ޑޮލަރުގެ މުއާމަލާތް ނުކުރެވޭ ގޮތަށް ހަދައި އިއްޔެ ގެންނަން އުޅުނީ ބަޣާވާތެއް ކަމަށާއި މިކަމުގައި ކުށްވެރިވާ ފަރާތްތަކުގެ މައްޗަށް ހުކުމް ތަންފީޒު ކުރުމުގައި ފަސްޖެހިވަޑައިނުގަންނަވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޕީއެންސީގެ ހަރުގެ ޖަލްސާގައި މިރޭ ވާހަކަފުޅުދައްކަވަމުން ރައީސް ވިދާޅުވީ އިއްޔެ ހިންގަން އުޅުނީ ބަޣާވާތެއް ކަމަށާއި އެކަން ފުލުހުން ބަލަން ފަށާފައިވާއިރު އެކަމުގެ ހަގީގަތް އެނގޭނީ ފުލުހުންގެ ތަހުގީގަށްފަހު ކަމަށެވެ. ފުލުހުންނަށް ނުފޫޒު ނުފޯރުވާނެ ކަމަށާއި ފުލުހުން ކުރާނީ ޕްރޮފެޝަން މަސައްކަތެއް ކަމަށް ރައީސް ވިދާޅުވި އެވެ.
"ވަރަށް ގިނަ މަސައްކަތްތަށް ދުރާލާ ރޭވިގެން، މިތާ ކައިރީ ބައެއް ގައުމުތަކުގައި މަގުމައްޗަށް ރައްޔިތުން ނިކުތްތަނުގެ މިސާލު ދައްކާ، ހިތްވަރުދީ ދެން މިހެން ގޮސް ވަރަށް ގިނަ ކަންތައް ކުރަން މަސައްކަތް ކުރި ނޫންތޯ. ވަރަށް މަސައްކަތް ކުރި. މިއީ ރޭވިގެން ހިނގި ކަމެއް. އެ ކުރި ގޮތެއް ބެލުން ފުލުހުން އެ އޮތީ ފަށާފައި. ފުލުހުން ކުރާނީ ޕްރޮފެޝަނަލް މަސައްކަތް،" ރައީސް ވިދާޅުވި އެވެ.
ރައީސް ވިދާޅުވީ ސަރުކާރު ޣައިރު ގާނޫނީ ގޮތަކަށް ބަދަލުކުރަން ކުރެވޭ މަސައްކަތާއި ދެކޮޅަށް ގާނޫނު އަސާސީން ލިބިދޭ ބާރުގައި މަސައްކަތް ކުރައްވާނެ ކަމަށެވެ. އަދި ފުލުހުންގެ ތަހުގީގަށް ފަހު ކުށްވެރިވަނީ ކޮންމެ މީހެއް ކަމަށްވީ ނަމަވެސް އެމީހެއްގެ މައްސަލަ ޝަރީއަތަށް ފޮނުވައިގެން ހުކުމެއް އަތުވެއްޖެނަމަ ތަންފީޒު ކުރުމުގައި ވެސް ފަހަތަށް ޖެހިވަޑައިނުގަންނަވާނެ ކަމަށް ރައީސް ވިދާޅުވި އެވެ. އެއީ އަދުލުވެރިކަން ކަމަށާއި އެއީ ބަދަލު ހިފުން ނޫން ކަމަށްވެސް ރައީސް ވިދާޅުވި އެވެ.