ބޭރުގެ ފައިސާއިން އާމުދަނީ ލިބޭ ވިޔަފާރިތައް ބްލެކް މާކެޓްގައި އެ ފައިސާ މާރުކުރުން ހުއްޓުވައި، ބޭންކަށް މާރުކުރަން މަޖުބޫރުވާ ގޮތަށް އެމްއެމްއޭގެ ގަވައިދުތައް ބަދަލުކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ޕީއެންސީގެ ޖަގަހަ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ކުރިއަށް އޮތް ދުވަސްތަކުގައި އެމްއެމްއޭގެ މަނިޓަރީ ރެގިއުލޭޝަނާއި މަނީ ޗޭންޖަސް ރެގިއުލޭޝަނަށް ބަދަލު ގެންނާނެ ކަމަށެވެ.
"މި ބަދަލުގެ ސަބަބުން ވާ ގޮތަކީ، ބޭރުގެ ފައިސާއިން އާމުދަނީ ލިބޭ ވިޔަފާރިތައް ރާއްޖޭގައި ވަރަށް ގިނައިން އެބަ ހިންގާ. މި ފައިސާ ބްލެކް މާކެޓުގައި މިހާރު މި މާރުކުރާ މާރުކުރުން ނިމުމަކަށް އައިސް ބޭންކަށް މާރުކުރަން މަޖުބޫރު ވާނެ،" ރައީސް ވިދާޅުވި އެވެ.
"ވަރަށް ގިނަ މީހުން ރުޅިއައިސް ދާނެ އަޅުގަނޑުމެން ދެކެ. އެކަމަކު އަޅުގަނޑު ހުންނާނީ ރައްޔިތުންގެ ފަޅީގައި،"
ރައީސް ވިދާޅުވީ ރާއްޖެއަށް އަންނަ ފޮރިން ޑައިރެކްޓް އިންވެސްޓްމަންޓުތަކުގެ ނަފާ ރާއްޖޭގެ ބޭންކުތަކުގައި ހިފެހެއްޓުމަށް ހިތްވަރު ލިބޭ ގޮތަށް ފޮރިން ޑައިރެކްޓް އިންވެސްޓްމަންޓު އަދި ބިޒްނަސް ޕްރޮފިޓް ޓެކްސްގެ ރެގިއުލޭޝަން ވެސް ބަދަލުތައް ގެންނާނެ ކަމަށެވެ. އޭގެ ސަބަބުން ރާއްޖޭގައި ޑޮލަރު ހިފެހެއްޓުމަށް ހިތްވަރު ދެވި، ރާއްޖޭގެ ޑޮލަރު ގިނަ ދުވަސް ވަންދެން ހިފެހެއްޓިގެން ދާނެ ކަމަށާއި އޭގެން ވެސް ރާއްޖެ އަށް ފައިދާކުރާނެ ކަމަށް ވިދާޅުވި އެވެ.
މީގެއިތުރުން ޑޮލަރުން މުސާރަދޭ ތަންތަނުގައި މަސައްކަތްކުރާ ދިވެހިންނަށް ދޭންޖެހޭ މުސާރަ ދިނުމަށްފަހު ފެންޝަން ވެސް ޑޮލަރުން ދޭންޖެހޭގޮތަށް ބަދަލުކުރަން ނިންމާފައިވާކަން ރައީސް ހާމަކުރެއްވި އެވެ.