މި ސަރުކާރަށް މިވީ 9 މަސްތެރޭގައި ރައްޔިތުން އަޖައިބުވާވަރަށް ކަންކަން ކޮށްދީފައިވާ ކަމަށް ޕީއެންސީގެ ޕީޖީ ގުރޫޕްގެ ލީޑަރު، އިނގުރައިދޫ ދާއިރާގެ މެމްބަރު އިބްރާހިމް ފަލާހު ވިދާޅުވެއްޖެ އެވެ.
ޕީއެންސީން ރޭ ބޭއްވި ހަރުގެ ޖަލްސާގައި ވާހަކަދައްކަމުން ފަލާހު ވިދާޅުވީ ރައީސް ޑރ. މުހައްމަދު މުއިއްޒާއި ރައްޔިތުން ވެރިކަން ހަވާލުކުރީ 9 މަސް ދުވަހަކަށް ނޫން ކަމަށާއި ފަސް އަހަރު ދުވަހަށް ކަމަށެވެ.
"އެ 9 މަސް ދުވަސްތެރޭ އަޅުގަނޑުމެންގެ އިއްޒަތްތެރި ރައީސުލްޖުމްހޫރިއްޔާ އެމަނިކުފާނުގެ ސަރުކާރުން، ރައްޔިތުންނަށް ހަގީގަތުގައި ކޮށްދިން ކަންތައްތައް އަޅުގަނޑުމެން ގަނޑެއްގައި ލިސްޓެއް ހަދައިފި ކަމަށްވާނަމަ ދިވެހި ރައްޔިތުން އަޖައިބުވާނެ،" ފަލާހު ވިދާޅުވި އެވެ.
ފަލާހު ވިދާޅުވީ ސަރުކާރުން ކޮށްދިން ބައެއް ކަންކަމަކީ ލޮލަށް ފެންނަން ހުންނަ ބޮޑެތި އިމާރާތް ގޮތަށް އަރާފައި ހުންނަ ކަންކަން ނޫން ކަމަށާއި ނަމަވެސް ރައްޔިތުންނަށް ވަރަށް ފައިދާ އާއި މަންފާ އަދި ލާބަހުރި ކަންކަން އޭގެތެރޭގައި ހުންނާނެ ކަމަށެވެ. އެގޮތުން މުސްތަގުބަލުގެ ޖީލުތަކަށް އެ ކަންކަމުގެ ފޮނި މީރުކަން ލިބޭނެ ކަންކަން ވެސް ހުންނާނެ ކަމަށް ފަލާހު ވިދާޅުވި އެވެ.
މީގެއިތުރުން ރޭގެ ޖަލްސާގައި ވެސް ފަލާހު ވަނީ ކުރީގެ ރައީސް އަބްދުﷲ ޔާމީނަށް ފާޑު ވިދާޅުވެ ވާހަކަދައްކަވާފަ އެވެ. އެގޮތުން ޔާމީންގެ ވެރިކަމުގައި މުލިއާގޭގައި ޕެނަޑޯލް ބަންދުކުރުމުގެ އިތުރަށް ވަޅުދިޔަ ހިއްކުމާއި އައްޑޫ ބޮޑި ވެސް ހަދަން ޖެހުނު ކަމަށް ފަލާހު ވިދާޅުވި އެވެ.
ފަލާހު ވިދާޅުވީ މިހާރު ވެސް މުލިއާގޭގައި ރައީސްގެ އަނބިކަނބަލުން އިންނަވާ ކަމަށާއި ނަމަވެސް މިކަހަލަ ނުބައި ވައްތަރު ކަންކަން ކުރަން އެކަމަނާ ނުޖައްސާ ކަމަށެވެ. އެގޮތުން އެންމެ ކުޑަމިނުން އެކަމަނާގެ ފޯނު ކޯލެއްވެސް ނާންނަ ކަމަށާއި އެކަމާ ދެރަވާ ކަމަށްވެސް ފަލާހު ވިދާޅުވި އެވެ.
ފަލާހު މިހެން ވިދާޅުވި އިރު ޔާމީންގެ ވެރިކަމުގައި އޭރު މަޖިލީހުގައި ތިއްބެވި ޕީޕީއެމްގެ މެމްބަރުން މުލިއާގޭގައި ޕެނަޑޯލް އާއި ޗޮކްލެޓް ބަންދުކުރަން ތިބި ފޮޓޯތަކެއް ސޯޝަލް މީޑިއާގައި އާންމުވެފައިވެ އެވެ.