ޔުވެންޓަސް އަށް ކުޅެމުން އަންނަ އިޓަލީގެ ވިންގާ، ފެޑެރީކޯ ކިއޭސާ ގެންނަން ލިވަޕޫލުން މަސައްކަތް ފަށައިފި އެވެ.
ޔުވެންޓަސްގެ އާ ކޯޗު ތިއާގޯ މޯޓާގެ ޕްލޭންތަކުގައި ކިއޭސާ ނުހިމެނޭއިރު، އެ ކްލަބުގެ ޕްރީ ސީޒަނުގައި ވެސް އޭނާ ބައިވެރިކޮށްފައެއް ނުވެ އެވެ.
ރިޕޯޓުތައް ބުނާގޮތުން ކިއޭސާ ގެނައުމާ ގުޅޭގޮތުން ލިވަޕޫލުން މިހާރު ވަނީ އޭނާއާއެކު މަޝްވަރާތައް ފަށާފަ އެވެ. އެގޮތުން ލިވަޕޫލަށް ބަދަލުވާން ބޭނުންވާކަން އެ ކްލަބަށް އޭނާ އަންގާފައިވާ ކަމަށްވެސް ރިޕޯޓުތައް ބުނެ އެވެ. ކިއޭސާ ވިއްކާލަން ޔުވެންޓަސް އިން ކިޔަނީ 15 މިލިއަން ޔޫރޯގެ އަގެކެވެ.
ކިއޭސާ ،26، ޔުވެންޓަސްއާއެކު ހަދާފައިވާ ކޮންޓްރެކްޓްގައި ބާކީ އޮތީ އެންމެ އަހަރެއް ކަމަށްވާއިރު، އޭނާ ގެންނަން ބާސެލޯނާ އިން ވެސް ޝައުގުވެރިކަން ވަނީ ފާޅުކޮށްފަ އެވެ.
ފިއޮރެންޓީނާ ދޫކޮށް 2020 ގައި ޔުވެންޓަސްއާ ގުޅުނު ކިއޭސާ ވަނީ އެ ކްލަބަށް 131 މެޗު ކުޅެދީފަ އެވެ. ނަމަވެސް އަނިޔާގެ ސަބަބުން ފާއިތުވި ސީޒަންތަކުގައި އޭނާ އަށް އެންމެ އެދެވޭ ކުޅުމެއް ދެއްކިފައެއް ނުވެ އެވެ.