އައިފޯން 16 ދައްކައިލަން ބާއްވާ އިވެންޓް އަންނަ މަހުގެ 9 އަށް ތާވަލުކޮށްފި އެވެެ.
މިއީ އިވެންޓް ބާއްވާނެ ކަމަށް މީޑިއާތަކުން ދާދި ފަހުން ރިޕޯޓްކުރި ތާރީހަށް ވުރެ އެއް ދުވަސް ކުރި އެވެ. އައިފޯން 16 ދައްކައިލާ އިވެންޓް އެޕަލް އިން ސިފަކޮށްފައި ވަނީ "އިޓްސް ގްލޯޓައިމް" ގެ ގޮތުގަ އެވެ.
އެހެންވެ އައިފޯން 16 ސީރީޒްވެގެން ވާނީ ވަރަށް ގިނަ ޒަމާނީ ފީޗާތަކެއް އެކުލެވޭ ވަރަށް "ވިދުން ގަދަ" ވަރަށް ހާއްސަ، ވަރަށް ފުރިހަމަ އުފެއްދުމަކަށް ކަމަށް ގިނަ ބަޔަކު އުންމީދުކުރެ އެވެ.
We’re glowing with excitement! Monday, September 9. #AppleEvent pic.twitter.com/QRVyZtqXYA
— Greg Joswiak (@gregjoz) August 26, 2024
އައިފޯން 16 ގެ ހަތަރު މޮޑެލްއެއް ނެރޭނެ ކަމަށް މީޑިއާތަކުން ބުނެ އެވެ. އެއީ އައިފޯން 16، އައިފޯން 16 ޕްރޯ، އައިފޯން 16 ޕްލަސް އަދި އައިފޯން 16 ޕްރޯ މެކްސް އެވެ. ކުލަތަކަށް ބަލާ އިރު އައިފޯން ޕްރޯ އާއި އައިފޯން ޕްރޯ މެކްސް ލިބޭނެ ކުލަތަކަކީ ސްޕޭސް ބްލެކް، ވައިޓް، ގްރޭ އަދި ރޯސް އެވެ. އަދި އައިފޯން 16 އާއި އައިފޯން 16 ޕްލަސްގެ ކުލަތަކުގެ ތެރޭގައި ހިމެނޭނީ ބްލެކް، ގްރީން، ޕިންކް، ބްލޫ، ވައިޓް އަދި ޔެލޯ އެވެ.
ރިޕޯޓްތައް ބުނާ ގޮތުން އައިފޯން 16 ސީރީޒްގެ ފޯނުތަކުގައި އާޓިފިޝަލް އިންޓެލިޖެންސް (އޭއައި) ގެ ވަރަށް މުހިއްމު ގިނަ ފީޗާތަކެއް ވެސް އެކުލެވޭނެ އެވެ. އަދި މި މޮޑެލްތަކުގައި ކެމެރާތަކުގައި ވެސް ވަރަށް ހާއްސަ ގިނަ ފީޗާތަކެއް އެކުލެވޭނެ އެވެ.
އަންނަ މަހުގެ 9 ގައި ބާއްވާ "އިޓްސް ގްލޯޓައިމް" އިވެންޓްގައި އައިފޯން 16 ގެ އިތުރުން އެހެން އިތުރު އުފެއްދުންތަކެއް ވެސް ދައްކައިލާނެ ކަމަށް ބެލެވެ އެވެ. އޭގެ ތެރޭގައި އެޕަލް ވޮޗްގެ އާ މޮޑެލްއަކާއި އެއާޕޮޑްސް 4 ގެ އާ ދެ މޮޑެލްއެއް ހިމެނެ އެވެ.