ބޭންކް އޮފް މޯލްޑިވްސް (ބީއެމްއެލް) އިން ޑޮލަރު ލިމިޓްކުރަން ނިންމި ދަނޑިވަޅަކީ އިދިކޮޅުން ގާނޫނީ ވެރިކަން ވައްޓާލުމަށް "ރޭވި" ރޭވުމެއް ކަމަށް ބުނެ ފުލުހުން ނެރުނު ބަޔާނުން ބޭންކަކީ ޓެރަރިސްޓް އޯގަނައިޒޭޝަނެއް ގޮތަށް ދޭހަވާ ކަމަށް ކެންދޫ ދާއިރާގެ މެންބަރު މައުރޫފް ޒާކިރު (މަޓޭ) ވިދާޅުވެއްޖެ އެވެ.
އެމްޑީޕީ ން ރޭ ބޭއްވި "ހަވަރު ބެރު" ޕެނަލް ޑިސްކަޝަންގައި އޭނަ ވަނީ ގައުމީ ބޭންކަކީ ޓެރެރިސްޓް އޮގަނައިޒޭޝަނެއް ގޮތަށް ފުލުހުންގެ ބަޔާނުން ސިފަވާތީ އެ ބޭން،ކުން ރައްޔިތުން ފައިސާ ޖަމާކުރުން ހުއްޓާލުމަށް ވެސް ގޮވާލައްވާފަ އެވެ.
"އެ ތަހުގީގަށް ބަލާލާއިރު ބޭންކް އޮފް މޯލްޑިވްސްއަކީ ޓެރެރިސްޓް އޯގަނައިޒޭޝަނެއް ގޮތަށް ފުލުހުންގެ ބަޔާނަށް ބަލައި މާނަކުރެވޭ ނަމަ، އަޅުގަނޑު ދަންނަވާނީ އެންމެ ދިވެހި ރައްޔިތަކު ވެސް މާދަމާއިން ފެށިގެން ބެންކަށް ފައިސާ ޖަމާ ނުކުރާށޭ،" މަޓޭ ވިދާޅުވި އެވެ. "ބެންކަށް ފައިސާ ލައިފިއްޔާ އެ ފައިސާ އަނބުރާ ލިބިދާނެ ކަމުގެ އެއްވެސް ޔަގީންކަމެއް ނެތޭ."
އޭނަ ވިދާޅުވީ ބީއެމްއެލް އަށް ވަކިން ހާއްސަކޮށް ޑޮލަރު ވެސް ޖަމާ ނުކުރަން ގޮވާލައްވައިފަ އެވެ. މަޓޭ ވިދާޅުވީ އެއްވެސް ހަމައެއް ނެތި ރާއްޖޭގެ މާލީ ހާލަތުގެ ވާހަކަ ބޭރު ދުނިޔެއަށް ހިފައިގެން ގޮސް، ބޭރު ގައުމުތަކުގައި ސަލާން ޖެހުމަކީ ހިތާމަވެރި ކަމެއް ކަމަށެވެ.
އަދި ބޭރު ގައުމުތަކަށް ރައީސް ޑރ. މުހައްމަދު މުއިއްޒު ސޮއިކުރައްވައި ގަނޑުކޮށް ފޮނުއްވާ ސިޓީތަކުން އަލި މަގެއް ނުފެނި، މާލީ ގޮތުން އޮތް ހާލަތު ސިއްރު ކުރަމުންދާ ކަމަށް ވެސް ވިދާޅުވި އެވެ.
ބީއެމްއެލްއަށް ޑޮލަރު ލިބުން ދަތިވެ، ރުފިޔާ ކާޑުތަކުން ކުރެވޭ ޑޮލަރު މުއާމަލާތްތައް އެއްކޮށް ކަނޑާލައި ކުރިން ދޫކޮށްފައިވާ ކްރެޑިޓް ކާޑުތަކުގެ ލިމިޓު 100 ޑޮލަރަށް ކުޑަ ކުރަން އެ ބޭންކުން ނިންމުމަށްފަހު، ސަރުކާރުން އަންގައިގެން އެ ނިންމުން ފަހުން ވަނީ ބަދަލުކޮށްފަ އެވެ.