ކުރިއަރަމުން އަންނަ ބޮލީވުޑްގެ ޒުވާން އެކްޓަރު ސިދާންތު ޗަތުރަވެދީގެ ފުރަތަމަ އެކްޝަން ތުރިލާ "ޔުދުރާ" އަންނަ މަހުގެ 20 ގައި ރިލީޒްކުރަން ނިންމައި، ފިލްމުގެ ޕޯސްޓަރުތަކެއް ވެސް ދައްކާލައިފި އެވެ.
ދެހާސް ވިހީގައި އިއުލާންކުރި މި ފިލްމަކީ ސިދާންތު ބޮލީވުޑަށް ނެރުނު 2019 ގެ ފިލްމު "ގަލީ ބޯއި" އުފެއްދި އެކްސަލް އެންޓަޓައިންމަންޓްގެ ފިލްމެކެވެ. އޭނަ އެންމެ ފަހުން ފެނިފައި ވަނީ ވެސް އެ ސްޓޫޑިއޯގެ ފިލްމަކުންނެވެ. އެއީ މިދިޔަ އަހަރުގެ ޑިސެމްބަރުގައި ނެޓްފްލިކްސް އިން ގެނެސްދިން ބަޑީ ޑްރާމާ "ކޯ ގަޔޭ ހަމް ކަހާ" އެވެ.
އަމީތާބް ބައްޗަން ކުރިން ކުޅެފައިވާ ކަހަލަ "އެންގްރީ ޔަންގް މޭން" ސްޓައިލްގެ ކެރެކްޓާއެއް ސިދާންތު، 31، ކުޅެފައިވާ "ޔުދުރާ" އަކީ ރަވީ އުދިއަވަރު ޑައިރެކްޓްކޮށްފައިވާ ފިލްމެކެވެ. މީގެ ބަތަލާ އަކީ އާންމުކޮށް އިންޑިއާގެ ދެކުނުގެ ފިލްމުތައް ކުޅޭ މަލްވިކާ މޯހަނަން އެވެ.
"ޔުދުރާ" ގެ އިތުރު ކާސްޓުންގެ ތެރޭގައި ރާހަވް ޖުޔަލް، ގަޖްރާޖް ރާއޯ، ރާމް ކަޕޫރް އަދި ޝިލްޕާ ޝުކްލާ ހިމެނެ އެވެ.
މި ފިލްމު އަންނަ މަހު ބެލުންތެރިންނަށް ދޫކޮށްލާ އިރު، ސިދާންތާއި ޓްރިޕްތީ ދިމްރީގެ ލޯބީގެ ފިލްމު "ދަޅަކް 2" ނޮވެމްބަރު 22 ގައި ގެނެސްދޭން އޮތީ ތާވަލުކޮށްފަ އެވެ. މިއީ ކަރަން ޖޯހަރްގެ ދަރުމާ ޕްރޮޑަކްޝަނަށް ޝާޒިއާ އިގްބާލް ޑައިރެކްޓްކޮށްފައިވާ ފިލްމެކެވެ.