ހިރާއްޖެ އާއި އިންޑިއަން އޯޝަން ޓޫނާ ކޮމިޝަން ގުޅިގެން، އިންޑިއާ ކަނޑުގެ އައްސޭރިފަށުގެ ގައުމުތަކުގެ މެދުގައި މަސްވެރިކަން ރާވާ، ހިންގައި، ބެލެހެއްޓުމުގައި ސައިންސްގެ ދައުރު އިތުރަށް ފުޅާކުރުމާއި އަދި ބެލެހެއްޓުމުގައި އަޅާ ފިޔަވަޅުތަކާ ބެހޭ ގޮތުން އެއްބަސްވާ އިރު އަމަލުކުރާނެ ގޮތްތަކާ ގުޅޭ މެނޭޖްމަންޓް ސްޓްރެޓެޖީ އިވެލުއޭޝަން ތަމްރީން ޕްރޮގްރާމެއް ފަށައިފި އެވެ.
މި ޕްރޮގްރާމް އިއްޔެ ބަނޑޮސް އައިލޭންޑް ރިސޯޓްގައި އިފުތިތާޙުކޮށް ދެއްވީ ފިޝަރީޒް މިނިސްޓްރީގެ ޕާމަނަންޓް ސެކްރެޓަރީ ޑރ. އާމިނަތު ޝާފިއާ އެވެ.
އެ ހަފުލާގައި އޭނަ ވިދާޅުވީ މިފަދަ ތަމްރީން ޕްރޮގްރާމްތަކެއް ބޭއްވުމަކީ އައްސޭރިފަށުގެ ގައުމުތައް ބާރުވެރިކުރުމުގައި އިސް ދައުރެއް އަދާކުރުމަށް މަގުފަހިވާނެ ކަމެއް ކަމަށެވެ.
ޕްރޮގްރާމްގައި އިންޑިއާ ކަނޑުގެ އައްސޭރިފަށުގެ 16 ގައުމަކުން 36 މަންދޫބުން ބައިވެރިވެ އެވެ.
ތިން ދުވަހުގެ މުއްދަތަށް ހިންގާ މި ޕްރޮގްރާމަކީ ވޯލްޑް ބޭންކްގެ އެހީގެ ދަށުން ހިންގާ ޓްރާންސްފޯމް ޕްރޮޖެކްޓްގެ ދަށުން ހިންގާ ޕްރޮގްރާމެކެވެ.
ޕްރޮގްރާމްގައި ފަންނީ މާހިރުންގެ ގޮތުގައި ބައިވެރިވެވަޑައިގަންނަވަނީ ސައުތު ޕެސިފިކްގެ ސައިންޓިސްޓުންނާއި އިންޑިއަން އޯޝަން ޓޫނާ ކޮމިޝަންގެ ސައިންޓިފިކް ކޮމެޓީގެ ޗެއާ އަދި އެކި ކޮމެޓީތަކުގެ އެންމެ ފުންނާބު އުސް ސައިންޓިސްޓުންނެވެ.