އަންނަ މަހު ރިލީޒްކުރަން ހަމަޖެހިފައިވާ ފިލްމު "އިމަޖެންސީ" އާ ގުޅިގެން ބަތަލާ ކަންގަނާ ރަނާވަތަށް އެކި ފަރާތްތަކުން ސޯޝަލް މީޑިއާގައި މަރުގެ އިންޒާރުދޭތީ އެކަން ފުލުހުންގެ ސަމާލުކަމަށް ގެނެސްފި އެވެ.
އިންޒާރުތަކުގެ މައްސަލަ އޭނަ ވަނީ މަހާރަޝްތުރާ ސްޓޭޓާއި ޕަންޖާބްގެ އިތުރުން ހިމާޗަލް ޕްރަދޭޝްގެ ފުލުހުންގެ ސަމާލު ކަމަށް ވެސް ގެނެސްފަ އެވެ.
Please look in to this @DGPMaharashtra @himachalpolice @PunjabPoliceInd https://t.co/IAtJKIRvzI
— Kangana Ranaut (@KanganaTeam) August 26, 2024
ވެރިކަންކުރާ ޕާޓީ، ބީޖޭޕީގެ މެންބަރެއްގެ ގޮތުގައި އިންޑިއާގެ ގާނޫނު ހަދާ މަޖިލީހުގެ ތިރިގެ ލޯކް ސަބާގެ މެންބަރެއްގެ ގޮތުގައި ވެސް މަސައްކަތް ކުރަމުން އަންނަ ކަންގަނާ އަށް މަރުގެ އިންޒާރު ދެމުން ދަނީ އަންނަ މަހުގެ 6 ގައި ރިލީޒްކުރަން ތާވަލުކޮށްފައިވާ "އިމަޖެންސީ" ގައި އިންޑިއާގެ ބައެއް ކޮމިނިއުޓީތަކާ މެދު ނަފުރަތު އުފެދޭ ގޮތަށް މަންޒަރުތަކެއް ހިމަނާފައިވާ ކަމަށް ބުނެ އެވެ.
އެގޮތުން ސިކުންގެ ޖަމާއަތެއް ކަމަށްވާ ޝިރޮމާނީ ގުރުދުވާރާ ޕްރަބަންދަކް ކޮމިޓީ (އެސްޖީޕީސީ) އިން ވަނީ ފިލްމު މަނާކުރަން ވެސް ގޮވާލައިފަ އެވެ. އެ ޖަމާއަތުން ބުނީ "އިމަޖެންސީ" ބިނާކޮށްފައި އޮތް، ކުރީގެ ބޮޑުވަޒީރު އިންދިރާ ގާންދީގެ ދައުރުގައި އިއުލާންކުރި ދުވަސްވަރު ދައްކުވައި ދޭ އިރު، ސިކުން ދައުރު ކަންބޮޑުވާ ގޮތަށް ދައްކުވައިދޭކަން ފިލްމުގެ ޓްރެއިލާ އިން ވެސް ހާމަވާ ކަމަށެވެ.
މީގެ އިތުރުން ވެސް އެކި ފަރާތްތަކުން މަރުގެ އިންޒާރު ދެމުންދާ ކަމަށް ކަންގަނާ ބުނެފައިވެ އެވެ.
"އިމަޖެންސީ" އަކީ ކަންގަނާ ޕްރޮޑިއުސްކޮށް، ޑައިރެކްޓްކޮށް ކުޅުނު ފިލްމެކެވެ. މީގައި އޭނަ ފެންނާނީ އިންދިރާގެ ރޯލުންނެވެ.