ޔޯގާ ދުވަސް ފާހަގަކުރުމަށް ހިންގި ހަރަކާތުގެ ތެރެއަށް ވަދެގަނެ ހަމަނުޖެހުން ހިންގި މައްސަލައިގައި ދައުވާ އުފުލި ޝައިޚް އާދަމް ނިޝާނާއި ފަޒްލޫން މުހައްމަދުގެ ޝަރީއަތް މިއަދު ކުރިއަށް ނުގެންދެވުނެވެ.
މި މައްސަލައިގައި ޝެއިހް ފަޒްލޫން އަދި ނިޝާންގެ މައްޗަށް އުފުލާފައިވަނީ ޓެރަރިޒަމް އަމަލެއް ކުރުމަށް ހިތްވަރު ދިނުމުގެ ދައުވާއެވެ.
މިއަދުގެ ކްރިމިނަލް ކޯޓުގައި ކުރިއަށް ގެންދިޔަ އަޑުއެހުމަށް ޝެއިހް ފަޒްލޫން އަދި ނިޝާން ހާޒިރުވި ނަމަވެސް ވަކީލުން ހާޒިރުވެފައެއް ނުވެއެވެ. އެގޮތުން އެއް ވަކީލަކު ބަލިވެ އުޅޭކަން އަންގާފައިވާ ކަމަށާއި އަނެއް ވަކީލަކު ފޯނު ނުނަގާކަން ފާހަގަ ކޮށްފައިވެއެވެ.
މިއަދުގެ ޝަރީއަތުގައި ދައުވާ ސާފު ކުރުމުގެ ގޮތުން ދައްކަންޖެހޭ ވާހަކަތައް ދެއްކުން ކުރިއަށް ގެންދިއުމަށް އޮތްނަމަވެސް ކުރިއަށްދާން ބޭނުންވަނީ ވަކީލާ އެކުކަމަށް ޝެއިހް ފަޒްލޫން އަދި ނިޝާންވެސް ފާހަގަ ކުރެއްވިއެވެ. އަދި އެކަމަށް ދައުލަތުން އިއުތިރާޒު ނުކުރުމުން، ދެން ބާއްވާ އަޑުއެހުމަކަށް ވަކީލަން ހާޒިރު ކުރުމަށް ޝެއިހް ފަޒްލޫން އަދި ނިޝާނަށް އަންގާފައިވެއެވެ.
21 ޖޫން 2022 ދުވަހު ބައިނަލްއަޤްވާމީ ޔޯގާ ދުވަހުގެ ހަރަކާތާ ދެކޮޅަށް ގަލޮޅު ބޯޅަދަނޑު ހިމެނޭ ސަރަޙައްދުގައި ބޭއްވި އެއްވުމުގެ ބައިވެރިން ގަލޮޅު ބޯޅަ ދަނޑު ތެރެއަށް ވަދެގަނެ، ޓެރަރިޒަމްގެ އަމަލުތަކެއް ހިންގި މައްސަލައިގައި ޝައިހް ފަޒްލޫން އަދި ނިޝާން ހިމެނޭހެން ގިނަ ބައެއްގެ މައްޗަށް ދައުވާ ކޮށްފައިވެއެވެ.