ނިޒާމު ނެގެެހެއްޓުމުގެ ވާހަކަ ދައްކަން ކުރީގެ ރައީސް އަބްދުﷲ ޔާމީން ލަދުވެތިވާންޖެހޭނެ ކަމަށް ކުރީގެ ޕްރޮސިކިއުޓާ ޖެނެރަލް މުހުތާޒް މުހުސިން ވިދާޅުވެއްޖެއެވެ.
ޔާމީނަށް ރައްދު ދެއްވާ މުހުތާޒް މިފަދައިން ވިދާޅުވީ، ރޭ ޕީއެންއެފްއިން ގެންދިޔަ ބައްދަލުވުމެއްގައި ޔާމީން ދެއްކެވި ވާހަކަތަކަކާ ގުޅިގެންނެވެ.
ޔާމީންގެ ވެރިކަމުގައި ޕީޖީގެ މަގާމު އަދާކުރެއްވި މުހުތާޒް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ޕްރޮސިކިއުޓާ ޖެނެރަލްގެ މަސްއޫލިޔަތުތައް ޤާނޫނުގައި ވަރަށް ސާފުކޮށް ބަޔާން ކޮށްފައިވާކަމަށެވެ. އަދި މައްސަލައެއްގައި ދައުވާ ކުރުމާއި ނުކުރުން ބިނާވަނީ އެ މައްސަލައެއްގައި ލިބިފައި ހުންނަ ހެއްކެއްގެ މައްޗަށް ކަމަށްވެސް ވިދާޅުވިއެވެ.
"އެއީ ރައީސަކަށް ހުންނަވާ ބޭފުޅަކު އަންގަވާ އަދި ބޭނުންވީމާ ކުރެވޭ ގޮތެއްގެ މަތިން އޮންނަ ކަމެއްނޫން." މުހުތާޒް ވިދާޅުވިއެވެ.
މުހުތާޒް ވިދާޅުވީ، ޔާމީން ބޭނުންފުޅުވިނަމަވެސް ކުރީގެ ނައިބު ރައީސް އަހުމަދު އަދީބުގެ މައްޗަށް ހެކި ނެތި ދައުވާ ނުކުރެވޭނެކަމަށް ދެންނެވި ކަމަށެވެ.
މީގެއިތުރުން މިއަދު ޔާމީންގެ އަރިހުގައި ތިއްބެވީ، ރިޔާސީ ލޯންޗްކޮޅުގައި އެއްޗެއް ގޮވި ކަމަށްބުނާ މައްސަލައިގައި ތުހުމަތު ކުރެވުނު ބޭފުޅަކާއި ޔާމީން ޖަލަށް ލުމަށް ގޮވަމުންދިޔަ ބައެއްކަން މުހުތާޒް ފާހަގަ ކުރެއްވިއެވެ.
މުހުތާޒް ވިދާޅުވީ ނިޒާމު ނެގެހެއްޓުމުގެ ވާހަކަ ދައްކަން ޔާމީން ލަދުވެތިވާންޖެހޭނެ ކަމަށާއި، މިހާރުގެ ރައީސް ޑރ. މުހައްމަދު މުއިއްޒުއަކީ ޔާމީން ހިންގެވިފަދަ މުޑުދާރުމަގުން ހިންގަވާނެ ބޭފުޅެއް ނޫންކަމަށެވެ.