14 މިލިޔަން ރުފިޔާއެއްގެ އެއްވެސް މުއާމަލާތެއް ރައީސް ޑރ. މުހައްމަދު މުއިއްޒުއާ އެއްވެސް އިރެއްގައި ކޮށްފައި ނުވާނެ ކަމަށް ކުރީގެ ޕޮލިސް ކޮމިޝަނަރު އަބްދުﷲ ރިޔާޒް ވިދާޅުވެއްޖެއެވެ.
ރިޔާޒް މިފަދައިން ވިދާޅުވީ ކުރީގެ ރައީސް އަބްދުﷲ ޔާމީންގެ ޕީއެންއެފްއިން ރޭ ބޭއްވި ޖަލްސާއެއްގައި މިފަދަ ކަމަކަށް ތުހުމަތުކޮށް ވާހަކަ ދެއްކުމާ ގުޅިގެންނެވެ. އެގޮތުން ކުރީގެ ނައިބު ރައީސް އަހުމަދު އަދީބު ހައްޔަރުކުރުމާއި ގުޅޭ ކަންކަމުގައި ރައީސް އޮފީހުގައި އަދި ޕާޓީ އޮފީހުގައި ދެކެވޭ ވާހަކަތަކުގެ މައުލޫމާތު ދިނުމަށް ރައީސް މުއިއްޒު އަދީބު އަތުން 14 މިލިއަން ނެންގެވި ކަމަށާއި މިކަންކަމުގައި ރިޔާޒް އުޅުއްވި ކަމަށް ތުހުމަތު ކޮށްފައިވެއެވެ.
މިކަމާ ގުޅިގެން ރިޔާޒް ވަނީ އެ ވާހަކަތަކަކީ ކަނޑައެޅިގެން ދޮގެއް ކަމަށް ވިދާޅުވެފަފއެވެ.
ރިޔާޒް ވިދާޅުވީ 2023 ރިޔާސީ އިންތިޚާބުގެ ދެވަނަ ބުރުގެ ކުރިން ސިޔާސީ އެއްވެސްކަމެއްގަ ރައީސް ޑރ. މުއިއްޒުއާއި ވާހަކަ ދައްކާ މަޝްވަރާކޮށް ހަދާފައި ނުވާނެ ކަމަށެވެ. އަދި 14 މިލިޔަންރުފިޔާއެއްގެ އެއްވެސް މުއާމަލާތެއް ފޯނުން، މެސެޖުން ނުވަތަ އަނގަބަހުން ރައީސް ޑރ. މުއިއްޒުއާ ކޮށްފަނުވާނެ ކަމަށްވެސް ރިޔާޒް ވިދާޅުވިއެވެ.
ކަނޑައެޅިގެން ބޮޑުދޮގެއް! 2023 ރިޔާސީ އިންތިޚާބުގެ 2 ވަނަބުރުގެކުރިން ސިޔާސީ އެއްވެސްކަމެއްގަ ރައީސް ޑރ. މުއިއްޒު އާއި ވާހަކަ ދައްކާ މަޝްވަރާކޮށްހަދާފަނުވާނެ. އަދި 14 މިލިޔަންރުފިޔާއެއްގެ އެއްވެސް މުއާމަލާތެއް ފޯނުން،މެސެޖުން ނުވަތައަގަބަހުން ރައީސް ޑރ. މުއިއްޒުއާއި ކޮށްފަނުވާނެ. https://t.co/E8dpNLTIxj
— Abdulla Riyaz (@riyazabdulla) August 27, 2024
ޕީއެންއެފްއިން ބާއްވަމުންދާ ޖަލްސާތަކުގައި އަންނަނީ ސިޔާސީ ގޮތުން ޔާމީނާ ވާދަވެރި ފަރާތްތަކުގެ ބޮލުގައި ބޮޑެތި ތުހުމަތުތައް އަޅުވަމުންނެވެ. އަދި ރައީސް މުއިއްޒުގެ ސަރުކާރަށް ފާޑުކިޔާ ގިނަ ވާހަކަތަކެއް ދައްކަމުންދެއެވެ.