ސަރުކާރުން ޗެލެންޖު ކުރީ ގައުމީވަންތަކަމާ ކަމަށާއި މިއީ ނުރައްކަލެއް ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ބޭންކް އޮފް މޯލްޑިވްސް (ބީއެމްއެލް) އިން ޑޮލަރު މުއާމަލާތްތަކަށް ގެނައި ބަދަލާއި ގުޅިގެން، ގާނޫނީ ސަރުކާރެއް ޣައިރު ގާނޫނީކޮށް ބަދަލު ކުރަން މަސައްކަތް ކުރި ކަމަށް ތުހުމަތުކޮށް ދެކެވޭ ވާހަކަތަކާ ގުޅިގެން އެމްޑީޕީން މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި އެމްޑީޕީގެ ރައިސް ޝާހިދު ވިދާޅުވީ ސަރުކާރުން މިކަމުގައި ދައްކަމުންދާ ވާހަކަތަކާމެދު ވިސްނަންޖެހޭ ކަމަށެވެ.
ބީއެމްއެލްގެ އެންމެ ބޮޑު ހިއްސާދާރަކީ ސަރުކާރުކަން ފާހަގަކޮށް ޝާހިދު ވިދާޅުވީ ސަރުކާރުގެ ކޮންޓްރޯލް އޮތް ބޭންކަކުން ސަރުކާރާ ދެކޮޅަށް ބަގާވާތެއް ކުރާކަމަށް ބުނާ ހިސާބުން ނުރައްކަލަށް ފުރޮޅެނީ ބޭންކުގެ ބޯޑު އެކަނި ނޫންކަމަށެވެ. އެފަދަ ތުހުމަތެއް ސަރުކާރުން ކުރާ ހިސާބުން އިނގިލި ދިއްކުރެވެނީ ބޭންކުގައި މަސައްކަތް ކުރާ ހުރިހާ މުވައްޒަފުންނާ ދިމާލަށް ކަމަށް ޝާހިދު ވިދާޅުވިއެވެ. އަދި އެއީ ބޮޑު ނުރައްކަލެއް ކަމަށް ވިދާޅުވިއވެެ.
ސްކޭމްފަދަ މައްސަލަތަކުގައި އާންމު ރައްޔިތުން ބޭންކާމެދު އޮތް އިތުބާރާ މެދު ސުވާލު އުފެދިފައިވާ ދަނޑިވަޅެއްގައި ބީއެމްއެލްއިން ބަގާވާތެއް ކުރި ކަމުގެ ތުހުމަތު ސަރުކާރުންކޮށް، ބޭންކުގެ ސީއީއޯ އިސްތިއުފާ ދޭންޖެހޭ ކަމަށް ބުނެ ކަންކަން އެހިސާބަށް ދިއުމުން، މިއީ ގައުމީ ވަންތަކަމަށް ކުރައްވާ ޖެލެންޖެއް ކަމަށާއި މިއީ ނުރައްކަލެއް ކަމަށް ޝާހިދު ވިދާޅުވިއެވެ.
ބީއެމްއެލްގެ ނިންމުމާއެކު ބައެއް މަޖިލިސް މެންބަރުން ޓްވީޓްކޮށް މިއީ ޑޮލަރު ލިބުން ދަތިވުމުން ކުރި ކަމެއްކަން ބުނެފައިވާކަމަށާއި އަދި އަންނަ ނޮވެމްބަރު މަހު ހަމައަކަށް އެޅޭނެއޭ ބައެއް މެންބަރުން ބުނިކަން ޝާހިދު ފާހަގަ ކުރެއްވިއެވެ. އަދި އޭގެފަހުން ވަޒީރުން ބޭންކުން އެޅި ފިޔަވަޅު އެއީ ކުރަންޖެހޭތީ ކުރި ކަމެއްކަމަށް ބުނެ ބޭންކުގެ ނިންމުން ދިފާއު ކުރިތަން ފެނުނު ކަންވެސް ފާހަގަކޮށް ޝާހިދު ވިދާޅުވީ ދެން ކުއްލިއަކަށް ފެނުނީ މުޅި އެތި ބަދަލުވެގެން ދިޔަތަން ކަމަށެވެ. އަދި ރައީސް މުއިއްޒު ސީދާ އިނގިލި ދިއްކޮށް ބުނީ ބަޣާވާތެކޭ ކަމަށާއި އެހެން ބުނުާއިރު ބަޣާވާތުގައި ވަޒީރުން އަދި ސަރުކާރަށް ތާއީދުކުރާ މެންބަރުން ބައިވެރިވީތޯ ސުވާލު އުފެދޭ ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ އެ ބޭފުޅުން ދެއްކި ވާހަކަތަކާ މިހާރު ދެކެވޭ ވާހަކައާ މުޅިން ތަފާތު ކަމަށެވެ. އަދި ސަރުކާރު މިހާރު އޮތީ ރޫޅިފައި ކަމަށާއި ބަލިކަށިވެފައި އޮތް ސަރުކާރެއްކަން ރައްޔިތުންނަށް ފެންނަ ކަމަށް ވިދާޅުވިއެވެ. އަދި ރައްޔިތުންގެ އިތުބާރު ސަރުކާރާ މެދު ނެތީ މިފަދަ ކަންކަމުގައި ކަމަށްވެސް ޝާހިދު ވިދާޅުވިއެވެ.