ފުޅާ ދާއިރާއެއްގައި ހަށިވިއްކުމުގެ ވިޔަފާރިކުރަމުންދިއަ ބިދޭސީންތަކެއް ޑީޕޯޓްކޮށްފި އެވެ.
އިމިގްރޭޝަނުން މިއަދު ބުނީ ފުލުހުންގެ އިންޓެލިޖެންސަށް ލިބުނު މަޢުލޫމާތަކާ ގުޅިގެން އިމިގްރޭޝަނާއި ފުލުހުން ގުޅިގެން މި މަހުގެ 11 ވަނަ ދުވަހު ހާއްސަ އިންސްޕެކްޝަނެއް ހިންގާފައި ކަމަށެވެ. އެގޮތުން ހަށިވިއްކުމުގައި ޝާމިލްވާ ބިދޭސީ ތިން އަންހެނަކާއި އެ މީހުންގެ އެޖެންޓުގެ ގޮތުގައި މަސައްކަތް ކުރަމުން ދިޔަ ބިދޭސީ ފިރިހެނަކު އިމިގްރޭޝަން ބެލުމުގެ ދަށަށް ގެނަސްފައިވެ އެވެ.
އަދި އެ މީހުންގެ މައްސަލަ ތަހުގީގު ކުރުމަށް ފަހު ރާއްޖެ އަނބުރާ ނާދެވޭ ގޮތަށް ޑީޕޯޓުކޮށްފައިވާ ކަމަށް އިމިގްރޭޝަނުން ބުންޏެވެ.
ބިދޭސީން ރާއްޖޭގައި ފުޅާކޮށް ހަށިވިއްކުމުގެ ވިޔަފާރި ކުރާތީ އެކަން ހުއްޓުވަން މިހާރު އަންނަނީ ހާއްސަ މަސައްކަތްތަކެއް ކުރަމުންމެވެ. މީގެ އިތުރުން ގަވާއިދާ ހިލާފަށް ބިދޭސީން ހިންގަމުން އަންނަ ތަފާތު ވިޔަފާރިތައް ހުއްޓުުވައި އެ މީހުންނަށް އަންނަނީ ފިޔަވަޅު އަޅަމުންނެވެ.
އިމިގްރޭޝަނުން މިއަދު ބުނި ގޮތުގައި މިދިޔަ އަހަރުގެ ނޮވެންބަރު ގެ 17 އިން ފެށިގެން މި މަހުގެ 25 އާ ހަމައަށް 3،322 ބިދޭސީން ޑީޕޯޓްކޮށްފައިވެ އެވެ.