ނެޝެނަލް ކައުންޓާ ޓެރަރިޒަމް ސެންޓަރު (އެންސީޓީސީ) އާއި ގައުމީ ޔުނިވާސިޓީ (އެމްއެންޔޫ) ގުޅިގެން އިލްމީ ދިރާސާއެއް ކުރުމަށް އެމްއޯޔޫއެއްގައި ސޮއިކޮށްފި އެވެ.
އެންސީޓީސީގެ ފަރާތުން އެއްބަސްވުމުގައި ސޮއި ކުރެއްވީ އެ ސެންޓަރުގެ ޑިރެކްޓަ ޖެނެރަލް މޭޖާ ޖެނެރަލް ރިޓަޔާޑް ވައިސް ވަހީދެވެ. ޔުނިވާސިޓީގެ ފަރާތުން ސޮއިކުރެއްވީ ވައިސް ޗާންސެލާ ޑރ. އާއިޝަތު ޝެހެނާޒް އާދަމެވެ.
ޝެހެނާޒް ވިދާޅުވީ އެއްބަސްވުމުގެ މަގުސަދުތަކުގެ ތެރޭގައި ސައިންސާއި އިޖުތިމާއީ ސްޓްރެޓެޖިކް ސްޓަޑީޒްއާ ސުލްހައާ ސަލާމަތީ ކަންކަމާ ގުޅޭ ދިރާސާތައް ހެދުން ހިމެނޭ ކަމަށެވެ. އެގޮތުން ދިރާސާގެ ދާއިރާގައި ހުރި މައްސަލަތައް ދެނެގަނެ ހައްލު ހޯދާދޭނެ ޖޮއިންޓް ކޮންފަރެންސްތަކާއި ސެމިނާތަކާއި މަހާސިންތާތައް ބޭއްވުމަށް ދެ ފަރާތް ގުޅިގެން މަސައްކަތް ކުރުމާއި އެ ދާއިރާތަކާ ގުޅޭ މޮޑިއުލްތައް އެއްބަސްވުމުގެ ދަށުން ކިޔަވައި ދެވޭނެ ކަމަށް ވެސް ވިދާޅި އެވެ.
މީގެ އިތުރުން އިންފޮމޭޝަން އެންޑް ޑާޓާ ޕްރިންޓް ރިފަރެންސް ވަސީލަތްތައް ވެސް ދެ ފަރާތް ގުޅިގެން ހިއްސާ ކުރުން މި އެއްބަސްވުމުގައި ހިމެނެ އެވެ.