ބޭންކް އޮފް މޯލްޑިވްސް (ބީއެމްއެލް) އިން ރުފިޔާ ކާޑަށް ޑޮލަރު ދޫކުރުން ހުއްޓާލަން އިއުލާން ކުރުމާ ގުޅުވައި ބަޣާވާތްކުރަން އުޅުނު ކަމަށް އިދިކޮޅަށް ތުހުމަތުކޮށް، ފުލުހުން އެ މައްސަލަ ބަލަން ނިންމީ ސިޔާސީ ނުފޫޒުން ކަމަށާއި އެހެންވެ ޕޮލި ކޮމިޝަނަރު އަލީ ޝުޖާއު އިސްތިއުފާ ދެއްވަން ޖެހިވަޑައިގަންނަވާކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
އެ ޕާޓީން މިއަދު ބޭއްވި ނޫސްވެރިންގެ ބައްދަލުވުމުގައި އޭނަ ވިދާޅުވީ، ނިމިދިޔަ އެމްޑީޕީ ސަރުކާރުން ވަނީ ފުލުހުންގެ މުއައްސަސާއަކީ މިނިވަން މުއައްސަސާއަކަށް ހަދައި އާންމުންގެ އިތުބާރު ހޯދުމަށްޓަކައި ގިނަ މަސައްކަތްތަކެއްކޮށްފައިވާ ކަމަށެވެ.
ނަމަވެސް، ރޭ ފުލުހުން ނެރުނު ބަޔާނުގެ ސަބަބުން އެ އިތުބާރު ގެއްލެން މަގުފަހިވެފައިވާ ކަމަށް ފައްޔާޒު ވިދާޅުވި އެވެ. އޭނަ ވިދާޅުވީ މިހާރު ފެންނަނީ ރައީސް ޑރ. މުޙައްމަދު މުއިއްޒު އަންގަވާ ގޮތަކަށް ފުލުހުންގެ ކަންކަން ކުރަމުންދާ ތަން ކަމަށެވެ.
"އަޅުގަނޑު މި ފުރުސަތުގައި ގޮވައިލަން ޕޮލިސް ކޮމިޝަނަރު އިސްތިއުފާ ދެއްވަން ވެސް،" ފައްޔާޒު ވިދާޅުވި އެވެ. "ޕޮލިސް ބޮޑީގެ، ޕޮލިސް ސާވިސްގެ ހުރުމަތް ހިފެހެއްޓުމަށް ޓަކައި އެ މަނިކުފާނު އިސްތިއުފާ ވެސް އެބަ ދޭންޖެހޭ."
އޭނަ ވިދާޅުވީ އެމްޑީޕީގެ ބޮލުގައި ބަޢާވާތުގެ ތުހުމަތު އެޅުވިޔަސް ސަރުކާރުގެ އޮޅުވައިލުންތަކާއި ނާގާބިލުކަމުގެ ވާހަކަ ތާއަބަދަށް ދައްކާނެ ކަމަށެވެ.