އިނގިރޭސިވިލާތުގެ ކުރީގެ ބޮޑުވަޒީރު ރިޝީ ސުނަކްގެ ދައުރުުގައި ހަދާފައި އޮތް ސަރުކާރުގެ ވީއައިޕީ ހެލިކޮޕްޓަރު ކޮންޓްރެކްޓް މިހާރުގެ ސަރުކާރުން ބާތިލުކޮށްފި އެވެ.
މީޑިއާތަކުން ބުނީ މިހާރުގެ ބޮޑުވަޒީރު ކިއާ ސްޓާމާ އެ ކޮންޓްރެކްޓް ބާތިލުކުރީ ޑިފެންސްގެ މިނިސްޓްރީއާ މަޝްވަރާތަކެއް ކުރުމަށް ފަހު އެވެ. އެ ކޮންޓްރެކްޓް ލޭބާ ޕާޓީ ސަރުކާރުން ބާތިލު މިކުރީ އެ ކޮންޓްރެކްޓް އާކުރަން ވާހަކަތަކެއް ވެސް ދެކެވިފައި ވަނިކޮށެވެ.
ރިޝީގެ ވެރިކަމުގައި ހަދާފައި އޮތް ވީއައިޕީ ހެލިކޮޕްޓަރު ކޮންޓްރެކްޓްގެ އަގު 40 މިލިއަން ޕައުންޑަށް އަރާ ކަމަށްވެ އެވެ. އޭނަގެ ދައުރުގައި ރޯޔަލް އެއާފޯސް (އާރްއޭއެފް) ގެ ހެލިކޮޕްޓަރުތަކާއި ޖެޓްތައް އެތެރޭގެ ދަތުރުތައް ވަރަށް އާންމުކޮށް ބޭނުން ކުރެއްވި އެވެ. އަދި ހެލިކޮޕްޓަރުގައި ރިޝީ ދަތުރުކުރައްވާތީ ވަރަށް ގިނަ ބައެއްގެ ފާޑުކިޔުންތަކެއް ވެސް އަމާޒުވި އެވެ.
މިހާރުގެ ސަރުކާރުން އެ ކޮންޓްރެކްޓް ބާތިލުކުރީ އެއީ "ކަނޑައެޅިގެން ބޭކާރު ހަރަދުތަކެއް" ކަމަށް ބުނެ އެވެ. އެގޮތުން ވެރިން ވީއައިޕީ ހެލިކޮޕްޓަރުގައި ދަތުރު ކުރަން ބޮޑު ހޭދަތަކެއް ކުރުމަށް ވުުރެ މުހިއްމު ކަންކަން ގައުމުގައި ކުރަން ހުރި ކަމަށް ބުނެފައިވެ އެވެ.