މިދިޔަ އަހަރު ޝާހްރުކް ޚާނާ އެކީ "ޖަވާން" ގެނެސްދިން ތަމަޅަ ޑައިރެކްޓަރު އެޓްލީ، ސަލްމާން ޚާނާ އެކީ ހަދަން ޕްލޭންކޮށްފައިވާ ފިލްމު އަންނަ ހުކުރު ދުވަހު އިއުލާން ކުރާނެ ކަމަށް ބައެއް މީޑިއާތަކުން ބުނެފި އެވެ.
އެ ދެ މީހުން އެކީގައި ފިލްމެއްގެ މަސައްކަތް ކުރަން އުޅޭ ވާހަކަ މި އަހަރު ފެށުނީއްސުރެ ދެކެވެމުން ދިޔަ ނަމަވެސް. ސަލްމާނާއި އެޓްލީ ވެސް އެކަމާ ބެހޭ ގޮތުން މިހާތަނަށް ރަސްމީކޮށް އެއްވެސް އެއްޗެއް ބުނެފައެއް ނުވެ އެވެ. ނަމަވެސް ފިލްމީ ޚަބަރުތައް ގެނެސްދޭ މީޑިއާތަކުން މިއަދު ބުނީ އެ ދެ މީހުންނަށް ވެސް މިހާރު އެއްބަސްވުމަކަށް އާދެވިފައިވާތީ ހުކުރު ދުވަހު ފިލްމު އިއުލާން ކުރުމުގެ ފުރުސަތު ވަރަށް ބޮޑު ކަމަށެވެ.
އަދި މި ފިލްމުގައި ސަލްމާން ޕްރޮޑިއުސަރެއްގެ ގޮތުގައި ވެސް ހިއްސާވާނެ ކަމަށް މީޑިއާތަކުން ބުނެ އެވެ. މިދިޔަ ޖޫން މަހުގެ ތެރޭގައި ބައެއް މީޑިއާތަކުން ބުނެފައިވާ ގޮތުގައި ސަލްމާނާ އެކީ އެޓްލީ ހަދާ ފިލްމުގެ ރޯލަކުން ރަޖްނީކާންތު ނުވަތަ ކަމަލް ހަސަން ވެސް ފެނުމުގެ ފުރުސަތު ވެސް ބޮޑެވެ.
ސަލްމާން މިހާރު އަންނަނީ މަޝްހޫރު ތަމަޅަ ޑައިރެކްޓަރު އޭއާރް މުރްގަދޯސްގެ އެކްޝަން ތުރިލާ "ސިކަންދަރު" ގެ މަސައްކަތް ކުރަމުންނެވެ. އޭނަ ޑަބަލް ރޯލެއް ކުޅޭ އަދި ސާޖިދު ނަދިއަދުވާލާ ޕްރޮޑިއުސްކުރާ މި ފިލްމު ރިލީޒްކުރާނީ އަންނަ އަހަރުގެ ފިތުރު އީދުގަ އެވެ.
މުރްގަދޯސް އަކީ އާމިރު ޚާންގެ 2008 ގެ "ގަޖިނީ" ގެނެސްދިން ޑައިރެކްޓަރެވެ.