މި ސަރުކާރުގައި އާއިލީ މީހުން އެބަތިބި ކަމަށާއި އެއީ ގާބިލު މީހުން ކަމަށް ރައްޔިތުންގެ މަޖިލީހުގެ ރައީސް އަބްދުލްރަހީމް އަބްދުﷲ މިރޭ ވިދާޅުވެއްޖެ އެވެ.
އަބްދުލްރަހީމް މިރޭ "ސަންގުޓީވީ" އަށް ދެއްވި ބަސްދީގަތުމެއްގައި ވިދާޅުވީ މި ސަރުކާރުގައި އާއިލީ މީހުން ތިބޭނެ ކަމަށާއި އެއީ ކިޔަވައިގެން ތިބި، ތަންދޮރު ދަންނަ މީހުން ކަމަށެވެ.
"އަޅުގަނޑުގެ ދަރިން ވެސް ތިބޭނެ. އަޅުގަނޑާ އެއްބަނޑު އެއްބަފާ މީހުން ވެސް ތިބޭނެ. އަޅުގަނޑުގެ އާއިލާ އަށް ނިސްބަތްވާ މީހުން ވެސް ތިބޭނެ. އެއީ އެއްގޮތަކަށް ވެސް ގަބޫލެއް ނުކުރަން އާއިލީ ވެރިކަމަކަށް މަގުފަހިކުރުމަށްޓަކާ ކޮށްފައި އޮތް ކަމެއް ކަމަކަށް،" އަބްދުލްރަހީމް ވިދާޅުވި އެވެ.
އަބްދުލްރަހީމް ވިދާޅުވީ އެމީހުންނަށް މަގާމުތައް ދީފައި ހުރީ އުސޫލުގެ ތެރެއިން އިލްމީ، ގާބިލު މީހުން ކަމަށް ރައީސް ޑރ. މުހައްމަދު މުއިއްޒަށް ފެނިވަޑައިގަންނަވާތީ ކަމަށެވެ. އަދި އެމަނިކުފާނުގެ ދަރިކަލުން ޓޫރިޒަމް މިނިސްޓަރު ކަމުގެ މަގާމުގައި ހުންނެވުމުން ވާދަވެރިން ކިތަންމެ ކަންބޮޑުވި ނަމަވެސް އެ ހަގީގަތް ބަދަލެއް ނުވާނެ ކަމަށްވެސް ވިދާޅުވި އެވެ.
"ފަހުރުވެރިކަމާއެކު މި ދަންނަވަނީ އަޅުގަނޑުގެ އާއިލާ މީހުން ތިބޭނެ މި ސަރުކާރުގައި. އެކަމަކު ތިބޭނީ އިލްމީ ގާބިލް މީހުންނޭ،" އަބްދުލްރަހީމް ވިދާޅުވި އެވެ.
މީގެއިތުރުން އަބްދުލްރަހީމް ވަނީ ހުސްވެފައިވާ ޕްރޮސެކިއުޓަރު ޖެނެރަލްގެ މަގާމަށް އާއިލީ ބޭފުޅަކު ގެންނަން މަސައްކަތް ކުރައްވާ ކަމަށް ބުނެ ދައްކަމުންދާ ވާހަކަތައް ވެސް ދޮގުކުރައްވާފަ އެވެ.