ކުޅޭ ފިލްމުތައް މަދުވިޔަސް މިހާރު އަމާޒަކީ އަމިއްލަ ޕްރޮޑަކްޑަޝަން ހައުސް އިން ގިނަ ފިލްމުތަކެއް ގެނެސްދިނުން ކަމަށް ބޮލީވުޑްގެ ތަރި އާމިރު ޚާން ބުނެފި އެވެ.
ބަތަލާ ރިއާ ޗަކްރަބަތީގެ ޕޮޑްކާސްޓް ޝޯ "ޗެޕްޓާ 2" ގެ އެންމެ ފަހުގެ އެޕިސޯޑްގައި މެހުމާނެއްގެ ގޮތުގައި ބައިވެރިވެ، އާމިރު ބުނީ އޭނަގެ ކުންފުނި، އާމިރު ޚާން ޕްރޮޑަކްޝަނުން މިހާރު ބޭނުން ވަނީ އަހަރަކު 4-5 ފިލްމު ގެނެސްދޭން ކަމަށެވެ. އަދި މީގެ އެންމެ ބޮޑު މަގުސަދަކީ ހުނަރުވެރި އާ މީހުންނަށް ފުރުސަތު ދިނުމާއި ތަފާތު އެކި ކަހަލަ ޝައުގުވެރި ވާހަކަތައް ބެލުންތެރިންނަށް ކިޔައި ދިނުން ކަމަށެވެ.
"ވަރަށް ބޭނުންވާ ހުނަރުވެރި ގާބިލު މީހުން ދާއިރާ އަށް ނެރެ އެ މީހުންނަށް ކުރިއަށް ދެވޭނެ ފުރުސަތުތައް ހޯދައި ދޭން." ބޮލީވުޑްގެ އެންމެ ކާމިޔާބު އެކްޓަރުންގެ ތެރޭގައި ހިމެނޭ އާމިރު ބުންޏެވެ.
އޭނަ ބުނޮ ގޮތުގައި އަމިއްލަ ޕްރޮޑަކްޝަން ހައުސް ހިންގުމުގައި މިހާރު އެންމެ އިސްކޮށް ހަރަކާތްތެރި ވަނީ އަޕަރްނާ ޕްރޮހިތު ކިޔާ މީހެކެވެ. އަދި އޭނަގެ ބެލުމުގެ ދަށުން ކުރިއަށް އޮތް ތަނުގައި ވަރަށް ގިނަ މަސައްކަތްތަކެއް ފެނިގެން ދާނެ ކަމަށް ބުންޏެވެ.
އާމިރު ޕްރޮޑިއުސްކޮށް އެންމެ ފަހުން ނެރުނު ފިލްމަކީ އޭނަގެ ކުރީގެ އަންހެނުން ކިރަން ރާއޯ ޑައިިރެކްޓްކޮށް މާޗްގައި ގެނެސްދިން "ލާޕަތާ ލޭޑީސް" އެވެ. ބެލުންތެރިންގެ ބޮޑު ތަރުހީބެއް ލިބުނު އެ ފިލްމަށް ފަހު، ދެން އެންމެ އަވަހަށް އާމިރުގެ ސްޓޫޑިއޯ އިން ގެނެސްދޭނެ ފިލްމަކީ އޭނަ ކުޅެފައިވާ "ސިތާރޭ ޒަމީން ޕަރް" އެވެ.
އެ ފިލްމު ރިލީޒްކުރަން ތާވަލުކޮށްފައި އޮތީ ޑިސެމްބަރަށެވެ. "ސިތާރޭ ޒަމީން ޕަރް" އަކީ 2022 ގެ "ލާލް ސިންގް ޗައްޑާ" އަށް ފަހު ރިލީޒްވާ އާމިރުގެ ފުރަތަމަ ފިލްމެވެ.
އާމިރު ޕްރޮޑިއުސްކޮށް ގެނެސްދޭން ތައްޔާރުވަމުން އަންނަ އިތުރު ފިލްމުތަކުގެ ތެރޭގައި ސަނީ ޑިއޯލްގެ "ލާހޯރް، 1947" އާއި ދަރިފުޅު ޖުނައިދު ޚާންގެ "ލަވް ޓުޑޭ" ގެ އިތުރުން މޯނާ ސިންގްގެ "ހެޕީ ޕަޓޭލް" ހިމެނެ އެވެ.
ރިއާގެ ޝޯގައި ހުނަރުވެރި އެކްޓަރު ބުނީ ސްޓޫޑިއޯގެ މަސައްކަތް ގިނަ ވިޔަސް އަމިއްލަ އަށް އަހަރަކު ކުޅެން ބޭނުން ވަނީ އެންމެ ފިލްމެއް ކަމަށެވެ. އެހެންވެ އެކްޓަރަކަށް ވުރެ ވުރެ ބޮޑަށް އޭނަގެ ދައުރު ޕްރޮޑިއުސަރެއްގެ ގޮތުގައި ދެން ބޮޑުވާނެ ކަމަށް ބުންޏެވެ.