މި އަހަރުގެ މިހާތަނަށް އިޓަލީން ރާއްޖެ އަށް އައި ޓޫރިސްޓުންގެ އަދަދު ވެސް 100،000 އިން މައްޗަށް އަރައިފި އެވެ.
ރާއްޖެ އަށް މިހާރު އެންމެ ގިނަ ޓޫރިސްޓުން އަންނަ 10 ގައުމުގެ ލިސްޓްގެ ހަތަރު ވަނައިގައި އޮތް އިޓަލީން މި މަހުގެ 27 އާ ހަމައަށް 100،367 ޓޫރިސްޓުން އައިސްފައިވެ އެވެ. މިއާ އެކީ އިޓަލީ ވެފައި ވަނީ 100،000 އަށް ވުރެ ގިނަ ޓޫރިސްޓުން މިހާތަނަށް ޒިޔާރަތްކުރި ހަތަރު ވަނަ ގައުމަށެވެ.
އިޓަލީން އަންނަ ޓޫރިސްޓުން 100،00 އިން މައްޗަށް އެރި އިރު، އެ ގައުމުގެ ޓޫރިސްޓުން އިތުރުކުރުމަށްޓަކައި މި އަހަރުގެ ތެރޭގައި އިޓަލީގައި ރޯޑްޝޯތަކެއް ވެސް ކުރިއަށް ގެންދަން ހަމަޖެހިފައިވާ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ދާދި ފަހުން ވިދާޅުވި އެވެ.
ރާއްޖެ އަށް މިހާރު އެންމެ ގިނަ ޓޫރިސްޓުން އަންނަނީ ޗައިނާއިންނެވެ. އެ ގައުމުން މި މަހުގެ 27 އާ ހަމައަށް 195،689 ޓޫރިސްޓުން އައިސްފައިވެ އެވެ. ދެން އެންމެ ގިނަ ޓޫރިސްޓުން އަންނަނީ ރަޝިއާ (144،950 ޓޫރިސްޓުން) އާއި އިނގިރޭސިވިލާތުން (116،268 ޓޫރިސްޓުން) އެވެ.
ރާއްޖެ އަށް މިހާރު އެންމެ ގިނަ ޓޫރިސްޓުން އަންނަ 10 ގައުމަށް ބަލާ އިރު މީގެ ތެރޭގައި ދެން ހިމެނެނީ ޖަރުމަން، އިންޑިއާ، އެމެރިކާ، ފްރާންސް، ސްޕެއިން އަދި ސްވިޓްޒަލޭންޑެވެ.
މި އަހަރުގެ މިހާތަނަށް ރާއްޖެ އަށް 1.3 މިލިއަނަށް ވުރެ ގިނަ ޓޫރިސްޓުން އައިސްފައިވެ އެވެ. މި އަހަރުގެ ޓާގެޓަކީ 2 މިލިއަން ޓޫރިސްޓުން ގެނައުމެވެ.
މިދިޔަ އަހަރު ރާއްޖެ އައީ 1.8 މިލިއަން ޓޫރިސްޓުންނެވެ. އަދި އެންމެ ގިނަ ޓޫރިސްޓުން އައިސްފައި ވަނީ މިހާރު ހަ ވަނައިގައި އޮތް އިންޑިއާއިންނެވެ.