އިނގިރޭސިވިލާތުގެ މަޝްހޫރު ބޭންޑް، އޮއޭސިސްގެ މެންބަރުން އަލުން އެއްވެ، 15 އަހަރު ފަހުން ޓުއާއަކަށް ނުކުންނަން ނިންމައިފި އެވެ.
މިކަން އިއްޔެ އިއުލާންކޮށް "އައިކޮނިކް" ބޭންޑް އިން ބުނީ ޝޯތަކެއް ދޭން ހަމަޖެހިފައި ވަނީ އިންގްލޭންޑާއި ވޭލްސް އާއި ސްކޮޓްލޭންޑްގެ އިތުރުން އަޔަލޭންޑްގައި ކަމަށެވެ. "އޮއޭސިސް ލައިވް 25" ގެ ނަމުގައި ކުރިއަށް ގެންދަން ނިންމި މިއުޒިކް ޓުއާ ފަށަން ހަމަޖެހިފައި ވަނީ އަންނަ އަހަރުގެ ޖުލައި 4 ގަ އެވެ.
މި ޓުއާގެ ތެރެއިން ބާއްވާ ޝޯތަކުގެ ޓިކެޓް ވިއްކަން މި މަހުގެ 31 ގައި ހުޅުވައިލާނެ އެވެ.
މެންޗެސްޓާ ނިސްވަތްވާ "އޮއޭސިސް" އުފެދުނީ 1991 ގަ އެވެ. އޭގެ ފަހުން 2009 އާ ހަމައަށް ބޭންކް ވަރަށް ކާމިޔާބު ކުރިއަށް ދިޔަ ނަމަވެސް އޭގެ ފަހުން މެންބަރުންތަކެއް މެދުގައި ކުނިޖެހި، ބޭންޑްގެ މަސައްކަތްތައް ހުއްޓުމަކަށް އައިސްފައިވެ އެވެ. ކުރިން ބޭންޑްގައި ފަސް މެންބަރުން ތިބި ނަމަވެސް، ބޭންޑް އަލުން އެ މީހުންގެ މިއުޒިކްގެ ތެރެއަށް ފޭނުން ގެންދަން ތައްޔާރުވާ އިރު، ބޭންޑާ އެކީ މިހާރު ތިބީ ތިން މެންބަރުންނެވެ. އެއީ ދެބެއިން ކަމަށްވާ ނޮއެލް، 57، އާއި ލިއަމް ގަލެގާ، 51، އެވެ.
"އޮއޭސިސް" ގެ ކާމިޔާބު މިއުޒިކީ ދަތުރުގައި ޖުމްލަ 7 އަލްބަމެއް ނެރުނެވެ. އެ ބޭންޑްގެ ފުރަތަމަ އަލްބަމަކީ 1994 ގެ "ޑިފިނިޓްލީ މޭބީ" އެވެ. އަދި އެންމެ ފަހުން ނެރުނު އަލްބަމަކީ 2008 ގެ "ޑިގް އައުތް ޔޯ ސޯލް" އެވެ.
ރިޕޯޓްތައް ބުނާ ގޮތުން "އޮއޭސިސް" 15 އަހަރުން ނުކުންނަ ޓުއާ އިން މަދުވެގެން 400 މިލިއަން ޕައުންޑް ހޯދާނެ އެވެ.