އެންމެ އިސްކަމެއް ދީގެން މިސަރުކާރުން ބަލާނެ އެއް މައްސަލައަކީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ހިޔާނާތުގެ މައްސަލަ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.
ޕީއެންސީން މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަބްދުއްރަހީމް ވިދާޅުވީ އެމްއެމްޕީއާރްސީގެ ހިޔާނާތަކީ ދައުލަތުގެ ވަރަށް ގިނަ ފައިސާ ހިމެނޭ މައްސަލައެއް ކަމަށާއި އެހެންކަމުން އެންމެ އިސްކަމެއް ދީގެން ބަލާނެ އެއް މައްސަލައަކީ އެމްއެމްޕީއާރްސީގެ ހިޔާނާތުގެ މައްސަލަ ކަމަށް ވިދާޅުވިއެވެ.
"އެއީ ދައުލަތުގެ ފައިސާ، ވަރަށް ބައިވަރު. މަދު އެތިކޮޅެއް ނޫން، ވަރަށް ބައިވަރު ފައިސާ ގެއްލިގެން މިއުޅެނީ." އަބްދުއްރަހީމް ވިދާޅުވިއެވެ.
އެމްއެމްޕީއާރްސީގެ ހިޔާނާތުގެ އިތުރުން މިދިޔަ ސަރުކާރުގައި ހިނގި ވެންޓިލޭޓަރު މައްސަލައާއި ފެނަކައިގެ މައްސަލަ ވެސް ބަލާނެ ކަމަށާއި މިފަދަ ބޮޑެތި މައްސަލަތައް ރައީސް ޑރ. މުހައްމަދު މުއިއްޒުގެ ސަރުކާރުން ބަލާނެކަމަށް އަބްދުއްރަހީމް ވިދާޅުވިއެވެ.
އަބްދުއްރަހީމް ވަނީ، ދައުލަތަށް ހިޔާނާތްވެފައިވާ މައްސަލަތައް ތަހުގީގުކޮށް ލިބެން ޖެހޭ ފައިސާ ހޯދުމުގެ މަސައްކަތަކީ އިސްކަމެއް ދީގެން ކުރައްވާނެކަމެއްކަން ރައީސް މުއިއްޒު ވިދާޅުވެފައިވާކަން ފާހަގަ ކުރައްވާފައެވެ.