ރައީސް ޑރ. މުހައްމަދު މުއިއްޒު ލަފަޔަށް އެދިވަޑައިގެންނެވި ކަންކަމުގައި ޕީއެންސީގެ ފަރާތުން ލަފާ އަރުވާފައިވާނެ ކަމަށާއި އެކަންކަމުގެ ނަތީޖާ ވަރަށް އަވަހަށް ފެންނާނެ ކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.
ޕީއެންސީން މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ސިޔާސީ މުވައްޒަފުން މަދުކުރުމުގެ ކަންކަމާއި ގުޅޭގޮތުން ކުރަމުންދާ ކަންކަމާ ގުޅޭގޮތުން ސުވާލު ކޮށްފައެވެ.
އެ ސުވާލަށް ޖަވާބު ދެއްވަމުން އަބްދުއްރަހީމް ވިދާޅުވީ މިއަދު އޮތީ ޕީއެންސީގެ ސަރުކާރަކަށް ވުމުން ޕީއެންސީގެ ޗެއާޕާސަންގެ ހައިސިއްޔަތުން ރައީސުލްޖުމްހޫރިއްޔާ ބޭނުންފުޅުވާ ކަންކަމުގައި ލަފާއަރުވަމުންދާ ކަމަށެވެ.
ޕާޓީގެ ލަފައަށް ރައީސް އެދިވަޑައިގަންނަވާ ކަންކަމުގައި އެ ލަފާ އަރުވަމުންދާ ކަމަށްވެސް ވިދާޅުވިއެވެ. އަދި އަބްދުއްރަހީމް ވިދާޅުވީ އެކަންކަން ތަންފީޒުވާނީ ކިހާހިސާބަކުކަން ދަންނަވަން ނޭންގޭ ކަމަށާއި އެކަން ނިންމަވާނީ ރައީސް ކަމަށެވެ.
"ރައްޔިތުންނަށް އަޅުގަނޑު ހަމަ ދަންނަވާލަން ބޭނުން. އެއްގޮތަކަށްވެސް މާޔޫސްވެވަޑައި ނުގަންނަވާށޭ، ރައްޔިތުންނަށް ނިކަމެތި ކަމެއް ލިބޭނެ އެއްވެސް ކަމެއް ރައީސުލްޖުމްހޫރިއްޔާ ނުކުރައްވާނެ." އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ ޕާޓީގެ ލީޑާޝިޕްގެ ބޭފުޅުން ރައީސްއަށް ކަންކަމުގައި އަރުވާ ލަފާ އަކުރުން އަކުރަށް ކިޔައި ނުދެވޭނެ ކަމަށާއި އެހެންނަމަވެސް ރައީސް އެދިވަޑައިގެންނެވި ކަންކަމުގައި ލަފާއަރުވާފައިވާނެކަން ތަކުރާރު ކުރެއްވިއެވެ. އަދި އެކަމުގައި ރައީސް ވަރަށް އަވަހަށް ފިޔަވަޅު އަޅުއްވާނެ ކަމަށް ގަބޫލު ކުރައްވާ ކަމަށާއި އަންނަ ބަދަލުތައް ފެނިވަޑައިގަންނަވާނެ ކަމަށް ވިދާޅުވިއެވެ.