ނޮވެމްބަރު މަހުގެ ނިޔަލަށް ޕީއެންސީއަށް 70،000 މެންބަރުން ހަމަކުރެވޭނެ ކަމަށް ޕީއެންސީގެ ޕާލިމެންޓަރީ ގްރޫޕުގެ ލީޑަރު އިބްރާހިމް ފަލާހު ވިދާޅުވެއްޖެއެވެ.
ޕީއެންސީން މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފަލާހު ވިދާޅުވީ ޕީއެންސީއަށް މެންބަރުން އިތުރު ކުރުމުގެ މަސައްކަތަކީ ރައީސް ޑރ. މުހައްމަދު މުއިއްޒުގެ އެދިވަޑައިގަތުމަށް މީގެ ދުވަސްކޮޅެއް ކުރިން ކުރަން ފެށުނު މަސައްކަތެއް ކަމަށެވެ. އަދި ރައީސްގެ އަމާޒަކީ 70،000 މެންބަރުން ނޮވެމްބަރުގެ ކުރިން ހަމަކުރެއްވުންކަން ފަލާހު ފާހަގަ ކުރެއްވިއެވެ.
ޕީއެންސީއަށް މެންބަރުން ވެއްދުމުގައި ކާމިޔާބު މަސައްކަތެއް ކުރެވޭކަން ފާހަގަކޮށް ފަލާހު ވިދާޅުވީ މިކަމުން ހާމަކޮށްދެނީ ރައީސް މުއިއްޒުއަށް ރައްޔިތުންގެ ތާއީދު އޮތް މިންވަރު ކަމަށެވެ.
މި މަސައްކަތް ފެށުނުއިރު ޕީއެންސީގައި ތިބީ 28،000 މެންބަރުންކަން ފާހަގަކޮށް ފަލާހު ވިދާޅުވީ ނޮވެމްބަރުގެ ނިޔަލަށް 70،000 މެންބަރުން ހަމަކުރެވޭނެކަން ޔަގީންވާ ކަމަށެވެ.