ކީރިތި ޤުރުއާން ހިތުދަސްކުރާ ފަރާތްތައް އުމްރާއަށް ފޮނުވުމުގެ މަޝްރޫއުގެ ދަށުން އުމްރާއަށް ފޮނުވާ ފުރަތަމަ ޙާފިޒަށް އެކަމުގެ ލިޔުން އަރުވައިފިއެވެ.
މިގޮތުން މި މަޝްރޫއުގެ ދަށުން އުމްރާ ދަތުރުގެ ފުރުސަތު އަރުވާފައިވަނީ އަލްޙާފިޡް އަލީ ރައީފުއަށެވެ. އަލްޙާފިޡް އަލީ ރައީފުއަށް ލިޔުން ހަވާލުކޮށްދެއްވީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުއެވެ.
މިއަދު އިސްލާމިކް މިނިސްޓްރީގައި މިކަމަށް ކުރިއަށް ގެންދިޔަ ރަސްމިއްޔާތުގައި ވާހަކަ ދައްކަވަމުން މިނިސްޓަރު ޝަހީމް ވިދާޅުވީ މި މަޝްރޫއު ލޯންޗުކުރެވި އުމްރާ ދަތުރު އެރުވިފައިވަނީ ވަރަށް ހާއްސަ ޙާފިޡެކަށް ކަމަށެވެ.
އެގޮތުން އަލްޙާފިޡް އަލީ ރައީފުއަކީ އެއްވަނަ ދަރަޖައިގައި ޤުރުއާނުގެ އާޔަތްތަކުގެ ނަންބަރާއެކު ހިތުދަސްކޮށްފައިވާ ހާފިޡެއްްކަން ފާހަގަ ކުރެއްވިއެވެ. އަދި މިކަމަށްޓަކައި ރައީފްއަށާއި ރަޢީފްގެ މައިންބަފައިންނަށް ތަހުނިޔާއާއި މަރުޙަބާ ދަންނަވާފައިވެއެވެ. މީގެ އިތުރުން މިިނިސްޓަރު ޝަހީމް ވިދާޅުވީ މި މަޝްރޫއު ކުރިއަށް ގެންދިއުމަށް ހަމަޖެހިފައިވަނީ ދީލަތި ފަރާތްތަކުގެ އެހީތެރިކަމާއެކުކަމަށާއި މިކަމަކީ ޤުރުއާން ހިތުދަސްކުރާ ފަރާތްތަކަށް ހިއްވަރު ދިނުމުގެ ގޮތުން ކުރައްވާ ކަމެއްކަމަށެވެ.
ޤުރުއާން ހިތުދަސް ކުރާ ފަރާތްތަކަށް ޢުމްރާއަށް ފޮނުވުމުގެ މަޝްރޫއުއެއް ފެށުމަށް ހަމަޖެހިފައިވާކަން މިނިސްޓަރު ޝަހީމް އިޢުލާން ކުރެއްވީ ކީރިތި ޤުރުއާން ކިޔެވުމުގެ 36 ވަނަ ޤައުމީ މުބާރާތުގެ ނިންމުމުގެ ރަސްމިއްޔާތުގައެވެ.