މަލްޓި ޑައިމެންޝަނަލް ޕޮވާޓީ އިންޑެކްސް (އެމްޕީއައި) ގެ ސަބަބުން މާލެ އާއި އަތޮޅުތެރެ އެެއް ހަމައެއްގައި ތަރައްގީ ކުރުމަށް ފަސޭހަވެފައިވާ ކަމަށް ހައުސިން މިނިސްޓަރު ޑރ. އަލީ ހައިދަރު ވިދާޅުވެއްޖެ އެވެ.
މިހާރު އުޒްބަކިސްތާނުގައި ކުރިއަށްދާ މަލްޓިޑައިމެންޝަނަލް ޕޮވަޓީ ޕިއާސް ނެޓްވޯކްގައި ވާހަކަ ދައްކަވަމުން މިނިސްޓަރު ވިދާޅުވީ އެމްޕީ އައި ބަލައިގަތުމަކީ ދިވެހިންގެ ދިރިއުޅުމުގެ ފެންވަރު ރަނގަޅުކުރުމަށް މުހިންމު އެކި ދާއިރާތައް ދެނެގަނެ، އެކަމަށް ހައްލު ހޯދުމުގެ ފުރުސަތު ސަރުކާރަށް ލިބިފައިވާ ކަމަށެވެ.
އަދި ރާއްޖެ އިތުރަށް ތަރައްޤީކުރާ އިރު ވެރިކަންކުރާ މާލެ އާއި އަތޮޅުތެރެ ހަމަހަމަކަމާއެކު ތަރައްޤީ ކުރަން ޖެހޭ ކަމަށާއި، އެގޮތަށް ކަންކަން ބައްޓަން ކުރުމަށް އެމްޕީއައިގެ ސަބަބުން ގިނަ ފަސޭހަތަކެއް ލިބޭކަމަށް މިނިސްޓަރު ވިދާޅުވި އެވެ.
ހައިދަރު ވިދާޅުވީ ސަރުކާރުން މިހާރު ވެސް އަމާޒުހިފައި ވަނީ ސަބްސިޑީ އާއި އިޖުތިމާއީ އިނާޔަތްތައް އެންމެ ބޭނުންޖެހިފައިވާ މީހުންނަށް ދެވޭނެ އިންތިޒާމު ހަމަޖެއްސުމަށް ކަމަށެވެ.
އެގޮތުން އެމްޕީއައި ތައާރަފްކުރުމާ އެކީ މޯލްޑިވްސް ބިއުރޯ އޮފް ސްޓެޓިސްޓިކްސް އިން އެންސްޕާއާ ގުޅިގެން ރާއްޖޭގެ ފަގީރުކަމުގެ ނިސްބަތް ދެނެގަނެ އެ ނިސްބަތް ދަށްކުރުމަށް މަސައްކަތްތަކެއް ފަށާފައިވާ ކަމަށް ވެސް މިނިސްޓަރު ވިދާޅުވި އެވެ.