މާލެ ސަރަހައްދުގައި ގަވާއިދާ ހިލާފަށް ވިޔަފާރިކޮށް، ސައްހަ ވިސާއެއް ނެތި އުޅޭ ބިދޭސީން ހޯދަން ކުރިއަށް 211 އޮފިސަރުންނާ އެކީ އިމިގްރޭަޝަނުން ބޮޑު އޮޕަރޭޝަނެއް ފަށައިފި އެވެ.
އެ އިދާރާ އިން ބުނީ މި އޮޕަރޭޝަންގައި ބައިވެރިން 52 ގްރޫޕަކަށް ބަހާލައިގެން ކުރިއަށް ގެންދާ އިރު، މާލެ ސަރަހައްދުގެ 26 ޒޯނެއް ބަލައި ފާސްކުރަން ހަމަޖެހިފައިވާ ކަމަށެވެ.
އިމިގްރޭޝަނުން ބުނީ މީގެ މަގުސަދަކީ މާލެ ސަރަހައްދުގައި ގަވާއިދާ ހިލާފަށް ކުދި އަދި މެދު ފަންތީގެ ވިޔަފާރި ކުރަމުންދާ ބިދޭސީން ދެނެގަނެ، އެ ފަރާތްތަކަށް އިމިގްރޭޝަނަށް ހާޒިރުވުމަށް އަންގައި، އަދި ގަވާއިދާ ހިލާފަށް ބިދޭސީން ލައްވައި މަސައްކަތްކުރުވާ ދިވެހިންނަށް ލިޔުމުން ނަސޭހަތް ދިނުން ކަމަށެވެ.
އަދި މި އޮޕަރޭޝަންގެ ތެރޭގައި ހޯދޭ މަޢުލޫމާތުގެ އެހީގައި މި މައްސަލައާ ގުޅިގެން މި ވަގުތު މާލެ ސަރަހައްދުގެ ހާލަތު ދެނެގަނެވޭނެ ކަމަށް އިމިގްރޭޝަނުން ބުންޏެވެ.
އެ އިދާރާ އިން މިހާތަނަށް ވެސް މިފަދަ އެތައް ރެއިޑް އޮޕަރޭޝަނެއްގައި ގިނަ އަދަދެއްގެ ބިދޭސީން އަތުލައިގެންފައިވެ އެވެ. އަދި މި ސަރުކާރު އައި ފަހުން އިމިގްރޭޝަނުން ވަނީ ގަވާއިދާ ހިލާފު 3،000 އަށް ވުރެ ގިނަ ބިދޭސީން ޑީޕޯޓްކޮށްފަ އެވެ.