އުމުރުން 65 އަހަރުން މަތީގެ މީހުންނަށް މިއަދު ޕެންޝަން ފައިސާ ޖަމާކުރި އިރު ބައެއް މީހުންނަށް ބޭންކް އޮފް މޯލްޑިވްސް (ބީއެމްއެލް) އިން އިތުރަށް ފައިސާ ޖަމާކޮށްފި އެވެ.
އެގޮތުން 5،000ރ. ރުފިޔާ ބަދަލުގައި ބައެއް މީހުންގެ އެކައުންޓަށް 15،000 ރުފިޔާ ޖަމާކޮށްފައިވެ އެވެ.
މިކަމާޕެންޝަން އޮފީހުން ބުނީ އެއީ ގައުމީ ބޭންކްގެ މައްސަލައެއް ކަމަށާއި އެ އޮފީހުގެ އެކައުންޓުން އިތުރަށް ކެނޑިފައެއް ނުވާ ކަމަށެވެ. ޕެންޝަން އޮފީހުން ކޮންމެ މަހަކު ވެސް 23،000 މީހުންނަށް ޕެންޝަނުގެ ފައިސާ ޖަމާކުރާ އިރު، ބީއެމްއެލް އަށް އޮޅިގެން ބައެއް މީހުންގެ އެކައުންޓަށް އިތުރަށް ފައިސާ ޖަމާކުރެވޭ މައްސަލަ ކުރިން ވެސް ދިމާވެފައިވާކަން ޕެންޝަން އޮފީހުން ފާހަގަކޮށްފައިވެ އެވެ.
ދާދި ފަހުން ވަނީ ލިލީ ބީޗް ރިސޯޓުގެ ބައެއް މުވައްޒަފުންނަށް މުސާރައިގެ ގޮތުގައި 77 ބިލިއަން ޑޮލަރު ވެސް ބީއެމްއެލް އިން ޖަމާކޮށްފައިވެ އެވެ. އަދި އެ މައްސަލަ ސަމާލު ކަމަށް އައުމާ އެކީ އެކަން ހައްލުކޮށްފައިވެ އެވެ.