އެސްޓީއޯގެ ދަށަށް ފެނަކަ ބަދަލު ކުރުމަކީ ނުރައްކަލެއް

އެސްޓީއޯގެ ދަށަށް ފެނަކަ ބަދަލު ކުރުމަކީ ނުރައްކަލެއް ކަމަށް އެސްޓީއޯގެ ކުރީގެ މެނޭޖިން ޑިރެކްޓަރު ހުސެއިން އަމްރު ވިދާޅުވެއްޖެ އެވެ.

އޭނަ ސޯޝަލް މީޑިއާ ޕޯސްޓެއްގައި ވިދާޅުވީ ފެނަކައިން މުސާރަ ނުދެވޭ ފަދަ މާލީ ދަތި ހާލަތެއްގައި އޮއްވައި އެ ކުންފުނި، އެސްޓީއޯ ދަށަށް ގެންދިޔުމަކީ ނުރައްކަލެއް ކަމަށެވެ.

"ވަޒީރު [އިކޮނޮމިކް މިނިސްޓަރު މުހައްމަދު ސައދު] އެ ވިދާޅުވާ ހަދާނެ ގޮތް ހުސްވެފައި ތިބި ކުންފުނިތަކުގެ ތެރޭގައި އެސްޓީއޯ ހިމެނޭ،" އަމްރު ވިދާޅުވި އެވެ. "ފެނަކައިން މުސާރަ ނުދެވޭ ހާލަތުގައި އޮއްވާ އެސްޓީއޯ ދަށަށް ގެންދިޔުމަކީ ނުރައްކަލެއް." .

ދައުލަތުގެ މީޑިއާ ޕީއެސްއެމްގައި ސައީދު ވިދާޅުވެފައި ވަނީ ފެނަކައިން އެކި ކުންފުނިތަކަށް ދައްކަން ޖެހޭ 3.2 ބިލިއަން ރުފިޔާ އޮތްއިރު، އެ ކުންފުނިތައް ތިބީ ހަދާނެ ގޮތް ހުސްވެފައި ކަމަށެވެ. އޭނަގެ ވާހަކަތަކަށް ރައްދުގައި އަމްރު ވިދާޅުވީ އެ 3.2 ބިލިއަން ރުފިޔާގެ ތެރެއިން 2.2 ބިލިއަން ރުފިޔާއަކީ ފެނަކައިން އެސްޓީއޯއަށް ދައްކަން ޖެހޭ ފައިސާ ކަމަށެވެ.

މި އަހަރު ނިމުމުގެ ކުރިން އެސްޓީއޯގެ ދަށަށް ފެނަކަ ބަދަލު ކުރަން ނިންމީ ވަޒީރުންގެ މަޖިލީހުގެ ލަފަޔާ އެކީ ރައީސް ޑރ. މުހައްމަދު މުއިއްޒެވެ. އެގޮތުން ސަރުކާރުން ނިންމީ ފެނަކައިގެ ސައްތައިން ސައްތަ ހިއްސާ އެސްޓީއޯއިން ގަތުމަށެވެ.

މިކަމާ ގުޅިގެން އެސްޓީއޯގެ ދަށަށް ފެނަކަ ބަދަލު ކުރުމުގެ މަރުހަލާ ކުރިއަށް ގެންދަން ފިނޭންސް މިނިސްޓްރީ އާއި ފެނަކަ ގުޅިގެން ޕްލޭނެއް އެކުލަވާލުމަށް އެސްޓީއޯގެ ބޯޑުން މިހާރު ވަނީ ނިންމައިފަ އެވެ.