ޔަހޫދީ އިޒްރޭލުން ފަލަސްތީނުގެ މުސްލިލުންމާ ދެކޮޅަށް ގަތުލުއާންމު ހިންގަމުންފާތީ ރާއްުޖޭގައި ތިބި ބޭރުގެ ސަފީރުންނަށް އަމާޒުކޮށްހެން ހަރަކާތްތަކެއް ހިންގަމުން ދިޔަ އަންހެނަކު ހައްޔަރުކޮށްފި އެވެ.
ފުލުހުން އިއްުޔެ ހައްޔަރުކުރީ އާއިޝަތު ޝާދިޔާ އާއި ޑރ. ޝަޒުރާ އިބްރާހީމެވެ. ޝާދިޔާ އަކީ ޑރ. މުހައްމަދު އިޔާޒްގެ އަނބިކަނބަލުންނެވެ.
ފުލުހުން ބުނީ އެ ދެ މީހުން އިއްޔެ މެންދުރު ފަހު ހައްޔަރުކުރީ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ހިލާފަށް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، ވަކި ސަފީރަކަށް އުނދަގޫވާ ގޮތަށް އަމަލުކޮށް، ފުލުހުންގެ ވާޖިބަށް ހުރަސް އެޅުމުން ކޯޓު އަމުރެއްގެ ދަށުން ކަމަށެވެ.
ފުލުހުން ނެރުނު ބަޔާނެއްގައި ބުނީ ދެ އަންހެނުން އަޑުގަދަކުރާ ބޭނުންކޮށްގެން ހަޅޭއްލެވުމާއި، ބޭއަދަބީ ބަހުރުވައިން މުއާމަލާތްކޮށް، އަދި ޑިޕްލޮމެޓިކް މިޝަންތަކުގެ މަސައްކަތަކަށް ހުރަސްއެޅޭ ގޮތަށް އަމަލު ކުރުމުގެ އިތުރުން ވަކި ސަފީރަކަށް އުނދަގޫ ކުރުމުގެ އަމަލްތަކެއް ހިންގަމުން ގޮސްފައިވާ ކަމަށެވެ.
ނަމަވެސް އެ މީހުން އުނދަގޫކުރީ ސީދާ ކޮން ސަފީރަކަށް ކަމެއް ފުލުހުން ނުބުނެ އެވެ. ފުލުހުން ވަނީ ގާނޫނުއަސާސީން ކަށަވަރުކޮށްދީފައިވާ އެއްވެ އުޅުމުގެ މިނިވަންކަމުގެ ހައްގު ބޭނުން ކުރުމުގައި ސުލްހަވެރި ކަމާއެކު އެއްވެ އުޅުމުގެ މިނިވަންކަމުގެ ގާނޫނަށް ހުރުމަތްތެރިކޮށް ހިތުމަށާއި ފުލުހުންގެ އިރުޝާދުތަކަށް ތަބާވާން އިލްތިމާސްކޮށްފަ އެވެ.
ޝާދިޔާ އާއި ޝަޒުރާ ވަނީ އިނގިރޭސިވިލާތުގެ އެމްބަސީ އާއި ޖަރުމަން އެމްބަސީ އާއި ޔޫއެން އޮފީގެ އިތުރުން އިނގިރޭސިވިލާތު އެމްބަސަޑަރު އަދި ސައުދީ އެމްބަސެޑަރު ހުންނަވާ ގެކޮޅު ކައިރީ މެދުކެނޑުމެއް ނެތި އިހުތިޖާޖުކޮށްފައިވެ އެވެ.