ގދ. ގައްދު އަކީ ވެށި ސާފު ރަށެއްގެ ގޮތުގައި ބޭއްވުމަށް އެ ރަށު ކައުންސިލުން ރައްޔިތުންނަށް އިލްތިމާސްކޮށްފި އެވެ.
ކައުންސިލުން ނެރުނު ބަޔާނެއްގައި ބުނީ ކައުންސިލުން ޚާއްޞަ އިސްކަމެއްދީގެން ރަށުގެ މަގުތަކާއި، ގޯޅިތައް އަދި ހުސްބިންތައް ސާފުކުރުމުގެ މަސައްކަތް ހުއްޓުމެއް ނެތި ކުރަމުން އަންނަ ކަމަށެވެ. ނަމަވެސް ބައެއް ފަރާތްތަކުން ގޯތިތަކާއި ގުޅިފައި ހުންނަ މަގުތަކާއި ގޯޅިތަކުގެ ވިނަ ނޮޅައި ސާފުކޮށް ނުބަލަހައްޓަވާތީ އެކަމުގެ ކަންބޮޑުވުންތަކާއި، ޝަކުވާތައް ސަރުކާރުގެ ބައެއް އިދާރާތަކުންނާއި، ޢާއްމުންގެ ފަރާތުން ވެސް ލިބެމުން އަންނަ ކަމަށް ކައުންސިލުން ބުންޏެވެ.
ގައްދޫ ކައުންސިލުން ބުނީ ރާއްޖޭގެ ބިމާ ބެހޭ ޤާނޫނުގައިވާ ގޮތުން ދިރިއުޅުމަށްޓަކައި ދޫކޮށްފައި ހުންނަ ގޯއްޗާއި، އެ ގޯއްޗަކާއި ގުޅިފައި ހުންނަ މަގުތައް ވިނަނޮޅައި ސާފުކޮށް ބެލެހެއްޓުމަކީ އެ ގޯއްޗެއްގެ ވެރިފަރާތް، ނުވަތަ އެ ގޯއްޗަކާއި ޙަވާލުވެގެން ހުންނަ ފަރާތަކުން ކުރަން ޖެހޭ ކަމެއް ކަމަށެވެ. ނަމަވެސް ގޯތިތެރޭގައި ހައްދާފައި ހުންނަ ރުއްގަސްތަކުން މަގުމައްޗަށް ފަނާއި ކާށި އަދި ހިކިފައި ހުންނަ ބޮނބި ފަދަ ތަކެތި ވެއްޓި އެފަދަ ތަކެތި ނުނަގާ ގިނަ ދުވަސްތަކެ އްވަންދެން ބަހައްޓަމުންދާ ކަމަށް ކައުންސިލުން ބުންޏެވެ.
އަދި އެފަދަ ކަންކަމަށް ބައެއް ގޯތިތަކުގެ ވެރިން މާ ބޮޑު ސަމާލުކަމެއް ނުދޭކަން ފާހަގަ ކުރެވޭ ކަމަށް ވެސް ކައުންސިލުން ބުންޏެވެ.
"ކަންކަން މިފަދަ ގޮތްގޮތަށް ހުރުމުގެ ސަބަބުން ދުއްވާތަކެއްޗަށާއި، ހިނގާ މީހުންނަށް ވަރަށްބޮޑަށް ދަތިވޭ. އެވެ. އަދި ވަކިން ޚާއްޞަކޮށް އެމްބިއުލާންސަށް ފަސޭހަކަމާއެކު މަގުތަކުން ދަތުރު ކުރެވޭ ގޮތަށް މަގުތައް ސާފުކޮށް އޮތުމަކީ މުހިއްމު އަދި އެހާމެ ބޭނުންތެރި ކަމެއްކަން އެއްމެހާ ފަރާތްތަކުން ވެސް ޤަބޫލު ކުރަން ޖެހޭ،" ގައްދޫ ކައުންސިލުން ބުންޏެވެ. "އެހެންވެ މިކަންކަމުގެ މައްޗަށް ސަމާލުވެ ގޯތިތަކާއި ގުޅިފައިއިވާ މަގުތައް ސާފުކޮށް ބެލެހެއްޓުމަށް އިލްތިމާސް ކުރަން."