އޮކްޓޯބަރު މަހު ބެލުންތެރިންނަށް ގެނެސްދޭން ހަމަޖެހިފައިވާ ހޮރޯ-ކޮމެޑީ "ބިބީ" ގެ އޮންލައިން ބުކިންސް އަށް ޑާކް ރެއިން އެންޓަޓައިންމަންޓުން ހުޅުވާލައިފި އެވެ.
އެގޮތުން އެކަމަށް ހާއްސަކޮށްފައިވާ ހޮޓްލައިން މެދުވެރިކޮށް މިހާރު ޓިކެޓް ބުކްކުރެވޭނެ އެވެ.
ޑާކް ރެއިނުން ގެނެސްދޭ ފުރަތަމަ ހޮރޯ-ކޮމެޑީ "ބިބީ" ޕްރީމިއާކުރަން ހަމަޖެހިފައި ވަނީ އޮކްޓޯބަރު 7 ގަ އެވެ. އަލަށް ޑައިރެކްޝަނަށް ނުކުތް ޝަހުދާ މަހުމޫދު ލިޔެ، ޑައިރެކްޓްކޮށްފައިވާ މި ފިލްމުގެ ޓީޒާއެއް ވެސް މި ހަފުތާގައި ވަނީ އާންމުކޮށްފަ އެވެ.
"ބިބީ" ގެ ލީޑް ޝަރަފު އަބްދުﷲ އާއި މަރިޔަމް މަޖުދާ (މަޖޫ) އެވެ. އިތުރު ކާސްޓުންގެ ތެރޭގައި ޝީލާ ނަޖީބާއި އަހުމަދު ސައީދާއި އަބްދުﷲ ޝާފިއު (ފުބޫ) އާއި އަހުމަދު ޝާކިރު ޝާއްކޮ (އައްމަޑޭ) އާއި އާދަމް ރިޒްވީ އަދި މަލީހާ ވަހީދު ފަދަ ފަންނާނުން ހިމެނެ އެވެ.
މީގެ އިތުރުން "ބިބީ" ގެ ވަރަށް ހާއްސަ ފެނިލުމެއްގައި ކުރީގެ މަޝްހޫރު ތަރި، އިސްލާއީމް ވަޖީހު ވެސް ހިމެނެ އެވެ.
މި ފިލްމަކީ ޑާކް ރެއިނުން މި އަހަރު ބެލުންތެރިންނަށް ގެނެސްދޭ ދެވަނަ ފިލްމެވެ. އެ ސްޓޫޑިއޯގެ މި އަހަރުގެ ފުރަތަމަ ފިލްމަކީ މާޗްގައި ގެނެސްދިން ރިވެންޖް، އެކްޝަން ތުރިލާ "ފުރޭތަ" އެވެ.