ސައްހަ ވިސާ ނެތި ރާއްޖޭގައި އުޅޭ ބިދޭސީން ހޯދަން މާލެ ސަރަހައްދުގައި އިމިގްރޭޝަނުން މިހާރު ކުރިއަށް ގެންދާ ބޮޑު އޮޕަރޭޝަން އަތޮޅުތަކަށް ވެސް ފުޅާކުރަން ނިންމައިފި އެވެ.
ކޮންޓްރޯލަ ޖެނެރަލް އޮފް އިމިގްރޭޝަން، މުޙައްމަދު ޝަމާން ވަހީދު އިއްޔެ ވިދާޅުވީ މާލެ ސަރަހައްދުގައި މި އޮޕަރޭޝަން ފެށުމާ ގުޅިގެން ބިދޭސީންތަކެއް ފިލަން އަތޮޅުތެރޭގެ ރަށްރަށަށް ދާކަން ފާހަގަ ކުރެވިފައިވާ ކަމަށެވެ. އެގޮތުން އެފަދަ މައްސަލަތަކެއްގެ ރިޕޯޓް ކުޅުދުއްފުށީ ސިޓީ ކައުންސިލުން ވެސް ލިބިފައިވާ ކަމަށް ވިދާޅުވި އެވެ.
އެހެންވެ ޝަމާން ވިދާޅުވީ ގަވާއިދާ ހިލާފަށް އުޅޭ ބިދޭސީން އަތުލައިގަންނަން ހިންގާ އޮޕަރޭޝަން އަތޮޅުތަކުގެ ރަށްރަށުގައި ވެސް ކުރިއަށް ގެންދިއުމަށް ވާން ޖެހޭ ތައްޔާރީތައް ވަމުން އަންނަ ކަމަށެވެ.
ރާއްޖޭގައި ގިނަ އަދަދެއްގެ ބިދޭސީ މަސައްކަތްތެރިން އުޅެމުންނަ އަންނަ އިރި، ރާއްޖޭގައި މިހާރު ބިދޭސީން ނޫޅޭ ރަށެއް ނެތެވެ.
ގަވައިދާ ހިލާފަށް އުޅޭ ބިދޭސީން އަތުލައިގަތުމުގެ މަސައްކަތް އިމިގްރޭޝަނުން ކުރިއަށް ގެންދާ އިރު، ހޯމްލޭންޑް މިނިސްޓްރީން މިހާރު އަންނަނީ ރާއްޖޭގައި އުޅޭ ހުރިހާ ބިދޭސީންގެ މައުލޫމާތު އެއްކުރަން "ކުރަނގި" ގެ ނަމުގައި އޮޕަރޭޝަނެއް ހިންގަމުންނެވެ. މި މަސައްކަތް ރަށްރަށުގެ ކައުންސިލްތައް މެދުވެރިކޮށް މިހާރު އަންނަނީ ކުރަމުންނެވެ.
އިމިގްރޭޝަނުން ބުނެފައިވާ ގޮތުގައި މިދިޔަ އަހަރުގެ ނޮވެމްބަރު 17 އިން ފެށިގެން މި މަހުގެ 26 އާ ހަމައަށް 3،000 އަށް ވުރެ ގިނަ ގަވާއިދާ ހިލާފު ބިދޭސީން ޑީޕޯޓްކޮޑްފައިވެ އެވެ. މިފަދަ މައްސަލަތައް ރިޕޯޓްކުރަން "އިމިގްރޭޝަން ވޮޗް" ގެ ނަމުގައި ޕްލެޓްފޯމެއް ވެސް އޮތީ ތައާރަފުކޮށްފަ އެވެ.
އެއަށް މިހާތަނަށް 500 އާ ގާތްކުރާ އަދަދަކަށް މައްސަލަތައް ރިޕޯޓްކޮށްފައިވެ އެވެ.