ރާއްޖޭގައި ތިއްބަވާ ބޭރު ގައުމުތަކުގެ ސަފީރުންނާއި އެ ބޭފުޅުންގެ ޢާއިލާތަކަށް ގޯނާ ކުރުމަކީ ފަލަޞްޠީނަށް ނަޞްރު ދިނުމެއް ނޫން ކަމަށް ވިދާޅުވެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ކަންބޮޑުވުން ފާޅުކުރައްވައިފި އެވެ.
ޔަހޫދީ އިޒްރޭލުން ފަލަސްތީނުގެ މުސްލިލުންމާ ދެކޮޅަށް ގަތުލުއާންމު ހިންގަމުންދާތީ ރާއްުޖޭގައި ތިބި ބޭރުގެ ސަފީރުންނަށް އަމާޒުކޮށްގެން ހަރަކާތްތަކެއް ހިންގަމުން ދިޔަ ދެ އަންހެނަކު އިއްޔެ ހައްޔަރުކޮށްފައިވެ އެވެ. އެ މައްސަލައިގައި ހައްޔަރުކުރީ އާއިޝަތު ޝާދިޔާ އާއި ޑރ. ޝަޒުރާ އިބްރާހީމެވެ.
ޝާދިޔާ އަކީ ޑރ. މުހައްމަދު އިޔާޒްގެ އަނބިކަނބަލުންނެވެ.
ޝާދިޔާ އާއި ޝަޒުރާ ވަނީ އިނގިރޭސިވިލާތުގެ އެމްބަސީ އާއި ޖަރުމަން އެމްބަސީ އާއި ޔޫއެން އޮފީގެ އިތުރުން އިނގިރޭސިވިލާތު އެމްބަސަޑަރު އަދި ސައުދީ އެމްބަސެޑަރު ހުންނަވާ ގެކޮޅު ކައިރީ މެދުކެނޑުމެއް ނެތި އިހުތިޖާޖުކޮށްފައިވެ އެވެ
ފުލުހުން ބުނީ އެ ދެ މީހުން އިއްޔެ މެންދުރު ފަހު ހައްޔަރުކުރީ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ހިލާފަށް ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، ވަކި ސަފީރަކަށް އުނދަގޫވާ ގޮތަށް އަމަލުކޮށް، ފުލުހުންގެ ވާޖިބަށް ހުރަސް އެޅުމުން ކޯޓު އަމުރެއްގެ ދަށުން ކަމަށެވެ.
ފުލުހުން ނެރުނު ބަޔާނެއްގައި ބުނީ ދެ އަންހެނުން އަޑުގަދަކުރާ ބޭނުންކޮށްގެން ހަޅޭއްލެވުމާއި، ބޭއަދަބީ ބަހުރުވައިން މުއާމަލާތްކޮށް، އަދި ޑިޕްލޮމެޓިކް މިޝަންތަކުގެ މަސައްކަތަކަށް ހުރަސްއެޅޭ ގޮތަށް އަމަލު ކުރުމުގެ އިތުރުން ވަކި ސަފީރަކަށް އުނދަގޫ ކުރުމުގެ އަމަލްތަކެއް ހިންގަމުން ގޮސްފައިވާ ކަމަށެވެ.
މިކަމާ ގުޅިގެން ޝަހީމު މިއަދު ވިދާޅުވީ އެތައް ދުވަހެއް ވަންދެން ވަކި ސަފީރެއްގެ ގޭދޮށުގައި އަޑުގަދަކޮށް ރާއްޖެއިން ފައިބަން ގޮވައި އެ ސަފީރާއި އާއި އާއިލާއަށް ބިރު ދެއްކުމަކީ އިންސާފެއް ނޫން ކަމަށެވެ.
ޝަހީމް މިއަދު ވަނީ ސައުދީ އުޅުއްވާ ގެ ކައިރި އަށް އަންހެނަކު ކުނި އަޅާ މަންޒަރު ފެންނަ ވީޑިއޯއެއް ވެސް ސޯޝަލް މީޑިއާގައި ހިއްސާކުރައްވައިފަ އެވެ.