ހުކުމް ތަންފީޒުކުރާ ގައިދީން މަސައްކަތް އުނގެނެން ހޭދަކުރާ ކޮންމެ ދުވަހަކަށް، އެ މީހުންގެ ހުކުމުން ދުވަހެއް އުނިވާނެ ގޮތަށް ގާނޫނަށް ބަދަލު ގެނައުމަށް ރައީސް ޑރ. މުހައްމަދު މުއިއްޒު ނިންމަވާފައި ވާކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެއެވެ.
މާފުށީ ޖަލުގައި ހެދި "ދިވެހި ސަގާފީ ގޯތި" ހުޅުވުމުގެ ރަސްމިއްޔާތުގައި މިނިސްޓަރު ވިދާޅުވީ މިކަމަކީ ގައިދީން ލުއި ދޭން ރައީސް ކަނޑައަޅުއްވާފައިވާ އާ ސިޔާސަތެއް ކަމަށެވެ.
"ގައިދީންގެ ތެރެއިން ރިހެބިލިޓޭޝަން މަސައްކަތުގައި ބައިވެރިވާ ކޮންމެ ގައިދީއަކު، އެއީ އެ މީހާ އިލެކްޓްރިކަލް އިންޖިއަނިރިންގެ ދާއިރާއިން ކަމުގައި ވީނަމަވެސް، ރޭނުމުގެ ދާއިރާއިން ވިއަސް ސަގާފީ މަސައްކަތުގެ ދާއިރާއިން ވިއަސް، މަސައްކަތް އުނގެނުމަށް ނުވަތަ މަސައްކަތް ކުރުމަށް މަސައްކަތް ކުރާ ކޮންމެ ދުވަހަކީ އެއީ ޖަލުހުކުމުން އެއް ދުވަސް ކެނޑިގެންދާނެ ދުވަހެއްގެ ގޮތުގައި ހަމަޖެއްސުން." މިނިސްޓަރު ވިދާޅުވި އެވެ.
އިހުސާން ވިދާޅުވީ މިފަދަ ބަދަލެއް ގެންނަން ނިންމާފައިވާތީ ގާނޫނުތަކާއި ގަވައިދުތަކަށް ގެންނަން ޖެހޭ ބަދަލުތައް ގެނެސް، ހަރުދަނާ ގޮތެއްގައި މިކަން ތަންފީޒުކުރުމަށް މަސައްކަތް ކުރައްވާނެ ކަމަށެވެ. އިހުސާން ވިދާޅުވި ގޮތުގައި ރައީސްގެ ވިސްނުންފުޅަކީ ޖަލުގައި ގައިދީން ހޭދަކުރާ މުއްދަތުގައި މަސައްކަތެއް ދަސްކޮށްގެން އާމްދަނީ ލިބޭނެ މަގެއް ހޯދައި، މުޖުތަމައަށް އަނބުރާ އަވަހަށް ނުކުމެވޭނެ ހަރުދަނާ ބަޔަކަށް ގައިދީން ހެދުން ކަމަށެވެ.
"މިތަނަށް ވަނުމާއެކު އެމީހާގެ އިސްލާހީ މަސައްކަތްތައް ފެށި އެމީހާ ކުރަންޖެހޭ ކަންތައްކޮށް ބަރާބަރަށް ދަސްކުރަން ޖެހޭ ކަންތައް ދަސްކޮށްގެން މުޖުތަމައަށް އަނބުރާ ބޭނުންތެރި ދިވެއްސެއްގެ ގޮތުގައި ގޮސް ރާއްޖެ ތަރައްގީކުރުމުގެ މަސައްތުގައި އުޅުން އެއީ ރައީސް ތިބޭފުޅުންގެ ފަރާތުން އެދިލައްވާ އެދިލެއްވުމަކީ." މިނިސްޓަރު ވިދާޅުވި އެވެ.
ޖަލުތަކުގައި ގައިދީންނަށް ތަފާތު މަސައްކަތްތައް ދަސްކޮށްދޭ ޕްރޮގްރާމްތައް އަންނަނީ ހިންގަމުންނެވެ. އަދި މަސައްކަތްތައް ދަސްކޮށްގެން ގައިދީންނަށް އާމްދަނީ ހޯދޭނެ ފުރުސަތު ވެސް އޮވެ އެވެ.
އިހުސާން ވިދާޅުވީ ގައިދީން ތައްޔާރުކުރާ އަތްތެރި މަސައްކަތްތަކުގެ އުފެއްދުންތައް ޖަލުގެ އެތެރޭގައި އާއި އެއާޕޯޓުގައި ޓޫރިސްޓުންނަށް ވިއްކޭނެ މަގުވެސް ފަހިކޮށް ދެއްވާނެ ކަމަށެވެ.