ރާއްޖޭގައި ލޭނު އަޅައިގެން މަސްވެރިކަން ނުކުރަން ނިންމައިފި އެވެ.
ރައީސް އޮފީހުން މިއަދު ބުނީ މިދިޔަ ޖޫން މަހުގެ 13 ގައި ވަޒީރުންގެ މަޖިލީހުން ފާސްކުރުމުން "'ބޮޑު ކަންނެލި މަސްވެރީންގެ ޔޫނިއަން" ގެ ފަރާތުން ރައީސް ޑރ. މުހައްމަދު މުއިއްޒަށް ކަންބޮޑުވުންތަކެއް ހުށަހެޅުމާ ގުޖިގެން ކެބިނެޓުން މި ނިންމި ނިންމުމަށް ޢަމަލު ނުކުރާ ގޮތަށް ރައީސް މިއަދު ހަމަޖައްސާފައިވާ ކަމަށެވެ.
ރާއްޖޭގައި ލޭނު މަސްވެރިކަން ކުރަން ހުޅުވައިނުލުމަށް ރައީސް ނިންމެވި ނިންމެވުމާއި ގުޅިގެން، އިތުރު މަޝްވަރާތައް ކުރެއްވުމަށް، 'ބޮޑު ކަންނެލި މަސްވެރީންގެ ޔޫނިއަން' އާއި، އަދި ކަމާ ގުޅުންހުރި މުހިންމު ހުރިހާ ފަރާތްތަކާ ވެސް، ވަގުތުވެވަޑައިގަތް އެންމެ އަވަހަކަށް ރައީސުލްޖުމްހޫރިއްޔާ ބައްދަލުކުރައްވާނެ އެވެ.
ރައީސް އޮފީހުން ބުނީ ސަރުކާރުން އަބަދުވެސް މަސައްކަތްކުރަމުން ދާނީ، ރައްޔިތުންގެ ޚިޔާލާއި މަޝްވަރާ އަޑުއަހައިގެން، ރައްޔިތުންގެ އެކި ކަންބޮޑުވުންތަކަށް ރަނގަޅު ޙައްލު ހޯދައިދެވޭނެ ގޮތަށް ކަމަށެވެ.
ލޭނު މަސްވެރިކަމަށް ހުއްދަ ނުދޭން ސަރުކާރުން މި ނިންމީ އަންނަ އަހަރުގެ ފެބްރުއަރީ މަހުގެ ތެރޭގައި އެ ފުރުސަތު ހުޅުވައިލާނެ ކަމަށް ފިޝަރީޒް މިނިސްޓަރު އަހުމަދު ޝިޔާމު އިއްޔެ ވިދާޅުވެފައި ވަނިކޮށެވެ.
މިނިސްޓަރު ވިދާޅުވެފައި ވަނީ މިއީ ރާއްޖޭގައި ކޮންމެހެން ކުރަން ޖެހޭ ކަމެއް ކަމަށާއި މީގެ ސަބަބުން ދައުލަތަށް ވަރަށް ބޮޑު އާމްދަނީއެއް ވެސް ވަންނާނެ ކަމަށެވެ.