އަލަށް ހަދަން ނިންމާފައިވާ ސެންޓްރަލް ޖަލާއެކު ގައިދީންނަށް ބޮލަކަށް ޖެހޭ ޚަރަދު ކުޑަކުރެވޭނެ ކަމަށް ހޯމްލޭންޑް މިނިސްޓަރު އަލީ އިޙްސާން ވިދާޅުވެއްޖެ އެވެ.
މާފުށީ ޖަލުގައި ހެދި "ދިވެހި ސަގާފީ ގޯތި" ހުޅުވުމުގެ ރަސްމިއްޔާތުގައި މިނިސްޓަރު ވިދާޅުވީ ޖަލު ހިންގުމަކީ ވަރަށް ޚަރަދު ބޮޑު ކަމެއް ކަމަށާއި މަހެއްގެ މައްޗަށް ބޮލަކަށް 27،000ރ. ރުފިޔާ ޚަރަދުވާ ކަމަށެވެ.
އެހެންވެ މިކަން ހައްލުކުރުމަށް ސެންޓްރަލް ޖަލެއް ގާއިމު ކުރަން ނިންމީ ދިރާސާކޮށްފައި ކަމަށް މިނިސްޓަރު ވިދާޅުވި އެވެ. އިހުސާން ވިދާޅުވި ގޮތުގައި ސެންޓްރަލް ޖަލު ޤާއިމުކުރުމަށް ނިންމާފައި ވަނީ އުތުރު ތިލަފަޅުގަގަ އެވެ. އަދި އެތަން ތިން އަހަރު ދުވަހުގެ ތެރޭގައި އޮޕަރޭޝަނަށް ގެނައުމުގެ މަސައްކަތް ކުރައްވަމުން އަންނަ ކަމަށް ވިދާޅުވި އެވެ.
"އެ ހިސާބުން ބޮލަކަށް ޖެހޭ ޚަރަދު ގާތްގަނޑަކަށް ސަތާރަހސް ރުފިޔާ އަށް ކުޑަކުރެވިގެން ދާނެ ކަމަށް އަޅުގަނޑުމެންގެ މިހާރުގެ ހިސާބުކިތާބުތަކުން ދައްކަނީ،" އިހުސާން ވިދާޅުވި އެވެ. "އަޅުގަނޑުމެން ކުރާ އުންމީދަކީ ޖަލުތަކަށް ކުރެވޭ ޚަރަދު ކުޑަކޮށް ޖަލުތަކުން ނެރެވޭ ނަތީޖާ އިތުރު ކުރުން."
ގައިދީން ބެލެހެއްޓުމުގެ ނިޒާމު ހަރުދަނާކުރުމަށް ރައީސް ޑރ. މުޙައްމަދު މުޢިއްޒުގެ އެންމެ މުހިންމު އެއް ވިސްނުންފުޅަކީ، މިހާރު އެކި ރަށްރަށުގައި ވަކިވަކިން ހިންގަމުން އަންނަ ޖަލުތައް އެއްކޮށްލައި މައި އެއް ޖަލަކުން ހުރިހާ ޚިދުމަތްތައް ދެވޭނެ ގޮތަށް ނިޒާމު ބައްޓަން ކުރުން ކަމަށް މިނިސްޓަރު ކުރިން ވެސް ތަކުރާރުކޮށް ވިދާޅުވެފައިވެ އެވެ.
ހޯމްލޭންޑް މިނިސްޓްރީން ބުނީ ސެންޓްރަލް ޖަލެއް ހެދިޔަސް އެކި ކަހަލަ ކުށްތަކުގައި ތިބި ގައިދީން ބެލެހެއްޓުމުގެ ކަންކަން މިހާރެކޭ އެއްގޮތަށް ވަކިކޮށް ބަލަހައްޓަމުން ދާނެ ކަމަށެވެ.