ލޭނު މަސްވެރިކަމަށް ހުއްދަ ނުދޭން ސަރުކާރުން ނިންމުމާ ގުޅިގެން ރައީސް ޑރ. މުހައްމަދު މުއިއްޒަށް ކުރީގެ ރައީސް މުހައްމަދު ނަޝީދު މަރުހަބާ ވިދާޅުވެއްޖެ އެވެ.
ސޯޝަލް މީޑިއާ ޕޯސްޓެއްގައި މަޖިލީހުގެ ކުރީގެ ރައީސް ވިދާޅުވީ ސަރުކާރުގެ އެ ނިންމުމަކީ ވަރަށް ރަނގަޅު ނިންމުމެއް ކަމަށާއި އެ ނިންމުމަށް މަރުހަބާ ވިދާޅުވި އެވެ. ލޭނު މަސްވެރިކަމަށް ސަރުކާރުން ހުއްދަ ދޭން ނިންމުމުން ނަޝީދު ކުރިން އެކަމާ ކަންބޮޑުވުން ފާޅު ކުރައްވައި މިއީ ރާއްޖޭގެ ޓޫރިޒަމަށާއި ރާއްޖޭގައި އޮންނަ ދޮށިން ބާނާ ކަޅުބިލަ މަހުގެ މަސްވެރިކަން ހަލާކުވެދާނެ ކަމެއް ކަމަށް ވިދާޅުވި އެވެ.
ނަޝީދުގެ މިއަދުގެ ޕޯސްޓްގައި ވެސް އެ ވާހަކަ ތަކުރާރު ކުރައްވާފައިވެ އެވެެ.
އަންނަ އަހަރުގެ ފެބްރުއަރީ މަހުގެ ތެރޭގައު ލޭނު މަސްވެރިކަމަށް ހުއްދަ ދޭން ސަރުކާރުން ތައްޔާރީތައްވުމަށް ފަހު، މިއަދު ރައީސް ވަނީ އެ ހުއްދަ ނިންމެވިކަން އިއުލާން ކުރައްވައިފަ އެވެ. މިކަމާ ގުޅޭ ގޮތުން ރައީސް އޮފީހުން ބުނީ އެގޮތަށް ނިންމެވީ "'ބޮޑު ކަންނެލި މަސްވެރީންގެ ޔޫނިއަން" ގެ ފަރާތުން ރައީސަށް ކަންބޮޑުވުންތަކެއް ހުށަހެޅުމާ ގުޅިގެން ކަމަށެވެ.
އަދި ރާއްޖޭގައި ލޭނު މަސްވެރިކަން ކުރަން ހުޅުވައިނުލުމަށް ރައީސް ނިންމެވި ނިންމެވުމާއި ގުޅިގެން، އިތުރު މަޝްވަރާތައް ކުރެއްވުމަށް، 'ބޮޑު ކަންނެލި މަސްވެރީންގެ ޔޫނިއަން' އާއި ކަމާ ގުޅުންހުރި މުހިންމު ހުރިހާ ފަރާތްތަކާ ވެސް، ވަގުތުވެވަޑައިގަތް އެންމެ އަވަހަކަށް ރައީސް ރައީސް ބައްދަލުކުރައްވާނެ ކަމަށް ބުނެފައިވެ އެވެ.
ރައީސް އޮފީހުން ބުނީ ސަރުކާރުން އަބަދުވެސް މަސައްކަތް ކުރާނީ ރައްޔިތުންގެ ޚިޔާލާއި މަޝްވަރާ އަޑުއަހައިގެން، ރައްޔިތުންގެ އެކި ކަންބޮޑުވުންތަކަށް ރަނގަޅު ޙައްލު ހޯދައި ދެވޭނެ ގޮތަށް ކަމަށެވެ.