މީގެ ހަތަރު އަހަރު ކުރިން ފެށިގެން ސްޓާ ޕްލަސް އިން ދައްކަމުން އަންނަ މަގުބޫލު ސިލްސިލާ "އަނޫޕަމާ" ގެ ލީޑް ބަތަލު ސުދާންޝޫ ޕާންޑޭ އެ ސިލްސިލާ އިން ވަކިވާން ނިންމައިފި އެވެ.
އޭނަ ސިލްސިލާ ދޫކޮށްލަން އުޅޭކަމުގެ އަޑުތަކެއް މީގެ ކުރިން ވެސް އަރާފައި ވަނިކޮށް 50 އަހަރުގެ އެކްޓަރު އިންސްޓަގްރާމް ވީޑިއޯ ޕޯސްޓެއްގައި ވަނީ "އަނޫޕަމާ" ގައި ކުޅެމުން އަންނަ ވަންރާޖް ޝާގެ ރޯލު ދޫކޮށްލާކަން އިއުލާންކޮށްފަ އެވެ. ސުދާންޝޫ ބުނީ މިއީ ކުއްލި ގޮތަކަށް ނިންމި ނިންމުމަކަށް ވިޔަސް، މިއީ އޭނަ އަށް މި ވަގުތު މުހިއްމު ނިންމުމެއް ކަމަށެވެ.
ސުދާންޝޫ ބުނީ މީގެ ކުރިން ވެސް އޭނަގެ ތަފާތު އެކި ކަހަލަ ރޯލުތައް ކުޅެފައިވާ ކަމަށާއި ވަންރާޖްގެ ކެރެކްޓާ އިން ވެސް ބެލުންތެރިން ވަރަށް ބޮޑު ސަޕޯޓަކާއި ލޯތްބެއް ދީފައިވާ ކަމަށެވެ. އެހެންވެ ކުރިއަށް އޮތް ތަނުގައި ވެސް ތަފާތު ރޯލުތަކުން ފެންނާނެ ކަމަށާއި މިހާތަނަށް ވެސް ފޭނުންނާއި ބެލުންތެރިން ދިން ލޯބި ކުރިއަށް އޮތް ތަނުގައި ވެސް ދޭނެ ކަމަށް އުންމީދުކުރާ ކަމަށެވެ.
"އަނޫޕަމާ" ގައި ވަންރާޖް ކުޅެމުން އައީ ޓައިޓްލް ރޯލު ކުޅޭ ރުޕާލީ ގަންގޫލީގެ ކުރީގެ ފިރިމީހާގެ ރޯލެވެ. މި ސިލްސިލާ ފެށިގެން އައި އިރު، އަނޫޕަމާއި ވަންރާޖް އުޅުނީ ކައިވެނިކޮށްގެންނެވެ. އަދި ޒުވާން ތިން ދަރިން ވެސް ތިބެ އެވެ. ނަމަވެސް ވަންރާޖް ގެންދިޔައީ ކައިވެނީގެ ބޭރުން ސިއްރު ގުޅުމެއް ހިންގައި، އަންހެނުންނަށް ބޭވަފާތެރިވަމުންނެވެ.
އޭނަގެ ނަތީޖާ އަކީ ވަންރާޖާއި އަނޫޕަޕާގެ ކައިވެނި ފަހުން ރޫޅި، ވަންރާޖް އޭނަގެ ލޯބިވެރިޔާ ކާވިއާ ކައިވެނި ކުރުމެވެ.
މިހާތަނަށް އައި އިރު "އަނޫޕަމާ" ގެ ވާހަކަ އިން އެތައް ކުރިއެއް ފަޅައި، ވާހަކަ އަށް ވަރަށް ބޮޑަށް ލީޕެއް އައިސްފައި އޮތަސް އަދިވެސް މީގެ މައިގަނޑު ޕްލޮޓް އެނބުރެނީ އަބަދު ވެސް އާއިލާއަށްޓަކައި ގުރުބާން ގެވެހި އަނޫޕަމާގެ ކެރެކްޓާ ވަށައިގެންނެވެ.
"އަނޫޕަމާ" ދައްކަން ފެށީ ޖުލައި 13، 2020 ގަ އެވެ. މި ސިލްސިލާގެ 1،373 އެޕިސޯޑް މިހާތަނަށް ދަައްކާފައިވެ އެވެ.
ސުދާންޝޫ މި ސިލްސިލާ ދޫކޮށްލަން ނިންމި އިރު، މީގެ ކުރިން ވެސް ސިލްސިލާގެ މުހިއްމު ކާސްޓުންތަކެއް ވަކިވެފައިވެ އެވެ. އޭގެ ތެރޭގައި އޭނަގެ ދެ ފިރިހެން ދަރިންގެ ރޯލު ކުޅުނު ޕަރަސް ކަލްނަވަތާއި އާޝިޝް މެހެރުތުރާ ހިމެނެ އެވެ.