މާލޭ ވޯޓަ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) އިން ކަރަންޓް ވަޔަރު ކުރުމަށް ބޭނުންވާ ކޮންޑިއުޓް ހޮޅި އަލަށް ރާއްޖޭގައި އުފައްދައި ބާޒާރަށް ނެރެފި އެވެ.
އެ ހޮޅި މިއަދު ބާޒާރަށް ނެރުން އިފުތިތާހުކޮށް ދެއްވީ އެކަމަށްޓަކައި ބޭއްވި ރަސްމިއްޔާތެއްގައި ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފް އުމަރާއި އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލް މަތީން މުހައްމަދެވެ.
އެމްޑަބްލިއުއެސްސީން ބުނީ ހޮޅި އުފައްދަނީ ގުޅީފަޅުގައި 2015 ގައި ގާއިމުކޮށްފައިވާ ހޮޅި އުފައްދާ ކާރުހާނާއިން ކަމަށެވެ. އެގޮތުން އެތަނުގައި ހަތަރު ސައިޒެއްގެ، ފެންވަރު ރަނގަޅު، ކޮންޑިއުޓް ހޮޅި އުފައްދައި ބާޒާރަށް ނެރެފައިވާ ކަަމަށް ބުންޏެވެ. ކަރަންޓް ވަޔަރިންގެ އެކި މަސައްކަތްތަކުގެ ބޭނުމަށް އުފައްދާ ހޮޅީގެ ތެރޭގައި؛ 16 މިލިމީޓަރާއި 20 މިލިމީޓަރާއި 25 މިލިމީޓަރާއި 32 މިލިމީޓަރުގެ އިތުރުން 40 މިލިމީޓަރުގެ އެކި ކުލައިގެ ކޮންޑިއުޓް ހޮޅި ހިމެނެ އެވެ.
އެމްޑަބްލިއުއެސްސީން ބުނީ ހޮޅި އުފައްދާ ކާރުޙާނާއަކީ އައިއެސްއޯ 9001 އަށް ސެޓިފައި ކުރެވިފައިވާ ތަނެއް ކަމަށެވެ.
އެ ކުންފުނިން ބުނީ ކޮންޑިއުޓް ހޮޅި އުފައްދައި ބަޒާރަށް ނެރެ ވިއްކަން ފެށުމުން، ރާއްޖޭގެ ކޮންސްޓްރަކްޝަން ދާއިރާގައި މަސައްކަތްކުރާ ކުންފުނިތަކާއި ހާޑްވެއަ ފިހާރަތަކަށް އެކަމުގެ ސަބަބުން ފަސޭހަތަކެއް ލިބިގެން ދާނެ ކަމަށެވެ. އަދި މީގެ ސަބަބުން ރާއްޖެ އިން ބޭރުން ކޮންޑިއުޓް ހޮޅި އެތެރެ ކުރަން ނުޖެހި، އަވަހަށް ފަސޭހަ އިން ހޮޅި ލިބޭނެ އިންތިޒާމު މިހާރު ފަހިވެގެން ދިޔައީ ކަމަށް ފެން ކުންފުނިން ބުންޏެވެ.
އެ ކުންފުނިން މިކަމުގެ ސަބަބުން ރާއްޖޭގެ އިގުތިސޯދަށް ވެސް އޭގެ ހެޔޮ އަސަރުތަކެއް ކުރާނެ އެވެ.