ރާއްޖޭގެ އިގްތިސާދީ ހާލަތު ރަނގަޅުކުރުމަށް ސަރުކާރުން އަޅާ އިސްލާހީ ފިޔަވަޅުތަކާ އެކު ފިޗް ރޭޓިން ރަނގަޅުވާނެ ކަމަށް ފިނޭންސް މިނިސްޓްރީން ބުނެފި އެވެ.
އެ މިނިސްޓްރީން މިހެން ބުނެފައި މިވަނީ ކްރެޑިޓް ރޭޓިން ކަނޑައެޅުމުގައި މުޅި ދުނިޔޭގައިވެސް އެންމެ ފާހަގަކުރެވޭ ކުންފުނި — ފިޗް ރޭޓިންގްސް އިން ރާއްޖެއަށް ދީފައިވާ ރޭޓިން "ސީސީ"އަށް ދަށްކޮށްފައި ވަނިކޮށެވެ.
ފިނޭނުންސުން ނެރުނު ބަޔާނެއްގައި ބުނީ ފިޗުން ފާހަގަކޮށްފައިވާ ފިސްކަލް ދާއިރާއަށާއި ބޭރު ފައިސާ ހޯދުމަށް ކުރިމަތިވެފައިވާ ދަތިކަމަށް ދާއިމީ ހައްލެއް ހޯދައިދިނުމުގެ ގޮތުން ސަރުކާރުން ދަނީ އާމްދަނީ އާއި ހަރަދުގެ ސިޔާސަތުތައް ވަށާޖެހޭ ގޮތެއްގައި ރިފޯމްކޮށް، މެދު ރާސްތާއަށް ދަރަނި ނަގަންޖެހޭ މިންވަރު ކުޑަކުރުމަށް ފިޔަވަޅުތަކެއް އަޅައި ތަންފީޒު ކުރުމަށް ތައްޔާރުވަމުންދާ ކަމަށެވެ.
ދައުލަތުގެ މާލީ ހާލަތާއި ބޭރު ފައިސާ ލިބުމަށް ހުރި ދަތިތައް ހައްލުކުރުުމުގެ ގޮތުން ދައުލަތަށް ލިބޭ އާމްދަނީ އިތުރުކޮށް ޚަރަދު ކުޑަކުރުމަށް ހަރުދަނާ ސިޔާސަތުތަކެއް އެކުލަވާލާފައިވާ ކަމަށާއި އޭގެ ތެރޭގައި އެއާޕޯޓް ޓެކުހާއި ފީއާއި ގްރީން ޓެކުހުގެ ރޭޓުތަކާއިި ސިއްހަތަށް ގެއްލުންދެނިވި ބައެއް ބާވަތްތަކުގެ އިމްޕޯޓް ޑިއުޓީ މަތިކުރުން ހިމެނޭކަން ފާހަގަކޮށްފައިވެ އެވެ. އަދި ޓީޖީއެސްޓީގެ ގޮތުގައި ލިބޭ ބޭރު ފައިސާގެ ޢާމްދަނީ އިތުރުކުރުމަށް ޖީއެސްޓީގެ ޤާނޫނު އިސްލާޙުކޮށް، ޓެކްސްގެ ބޭސްފުޅާކުރުން ހިމެނޭކަމަށް ފިނޭންސުން ބުނެ އެވެ.
އާމްދަނީގެ ސިޔާސަތުތަކަށް ގެންނަ ބަދަލުތަކުގެ ސަބަބުން ޖުމްލަ ގޮތެއްގައި ދައުލަތަށް ލިބޭ ބޭރު ފައިސާގެ އާމްދަނީ އިތުރުވެ، ސޮވްރިން ޑިވެލޮޕްމެންޓް ފަންޑަށް ޖަމާކުރާ ޑޮލަރުގެ މިންވަރު ވެސް އިތުރު ކުރެވޭނެ ކަމަށް ފިނޭންސް މިނިސްޓްރީން ބުންޏެވެ.
"އެގޮތުން ދައުލަތުގެ ރަސްމީ ރިޒާވްއާއި އެކްސްޓާނަލް ސެކްޓާއަށް ހުރި ހިރާސްތައް ކުޑަކުރެވި، ބޭރު ފައިސާއިން އަދާކުރަން ޖެހޭ ދަރަނިތައް އަދާ ކުރުމަށް ފަސޭހަވެގެންދާނެއެވެ." މިނިސްޓްރީގެ ބަޔާނުގައިވެ އެވެ.
މީގެ އިތުރުން ފިސްކަލް ދެމެހެއްޓެނިވިކަން ކަށަވަރު ކުރުމުގެ ގޮތުން ދައުލަތުގެ ޚަރަދުތައް ކޮންޓްރޯލް ކުރުމުގެ ސިޔާސަތުތަކެއް ވެސް އެކުލަވާލައި ތަންފީޒުކުރާކަން މިނިސްޓްރީން ވަނީ ފާހަގަކޮށްފައިވެ އެވެ. އެގޮތުން ސަރުކާރު ހިއްސާވާ ކުންފުނިތަކުގެ އިސްރާފުތައް ކުޑަކޮށް އެފިޝިއަންޓްކުރުމާއި، ދައުލަތުން ފޯރުކޮށްދޭ އިންޑައިރެކްޓް ސަބްސިޑީތައް ބަދަލުކޮށް ދައުލަތުގެ އެހީތެރިކަމަށް އެންމެ ބޮޑަށް ބޭނުންޖެހިފައިވާ ފަރާތްތަކަށް ޑައިރެކްޓް ސަބްސިޑީއަށް ބަދަލުކުރުމަށް ސަރުކާރުންދަނީ މަސައްކަތްކުރަމުންނެވެ. އެގޮތުން ސިއްޙީ އިންޝުއަރެންސްގެ ޤައުމީ ނިޒާމު ހަރުދަނާކުރުމާއި ދުނިޔޭގެ ބާޒާރުގައި ތެލުގެ އަގަށް އަންނަ ކުއްލި ބަދަލުތަކަުން ކުރިމަތިވާ ދަތިތަކުން ރައްކާތެރިވުމުގެ ގޮތުން ފިއުލް ހެޖިންގއާބެހޭ ސިޔާސަތު ތަންފީޒުކުރުމާއި، ސަރުކާރުގެ (ޑިސްކްރެޝަނަރީ ޚަރަދުތައް) ކުޑަކުރުމަށް ރާވާފައިވާކަމަށް ބުނެފައިވެ އެވެ.
މި ބަދަލުތަކަކީ ދައުލަތުން ދަރަނި ނަގަން ޖެހޭ މިންވަރު ކުޑަކޮށް، ފިސްކަލް އަދި އެކްސްޓާނަލް ސެކްޓަރުގެ ހާލަތު ރަނގަޅުކުރުމުގެ މަގުސަދުގައި އެކުލަވާލައި ތަންފީޒު ކުރުމަށް ރާވާފައިވާ ބަދަލުތައް ކަމަށާއި އަދި ރާއްޖެއަށް ދިމާވެފައިވާ ބޭރު ފައިސާގެ ދަތިތަކަށް އެކަށީގެންވާ ހައްލެއް ހޯދުމުގެ ގޮތުން އެކުވެރި ދައުލަތްތަކާއި ބައިނަލްއަގުވާމީ މާލީ އިދާރާތަކާއެކު މަސައްކަތް ކުރަމުން އަންނަ ކަމަށް ބަޔާނުގައި ފާހަގަކޮށްފައިވެ އެވެ.
"މި ސިޔާސަތުތައް ތަންފީޒުވެ، މިއަހަރާއި މެދު ރާސްތާގައި ފަތުރުވެރިކަމުގެ ދާއިރާއަށާއި އިގުތިސާދަށް އަންނާނެ ކަމަށް ބެލެވޭ ކުރިއެރުމާއެކު ދައުލަތުގެ ފިސްކަލް އަދި ދަރަނީގެ ދެމެހެއްޓެނެވިކަން އިތުރު ކުރެވޭނެ އެވެ." ފިނޭންސް މިނިސްޓްރީން ބުނެފައިވެ އެވެ.
މިގޮތުން 2028ގެ ނިޔަލަށް ގައުމީ އުފެއްދުންތެރިކަމުގެ ނިސްބަތުން ޖުމްލަ ދަރަނި 90 އިންސައްތައަށްވުރެ ކުޑަ ކުރެވޭނެ ކަމަށާއި އެއާއެކު މުސްތަގުބަލުގައި ކްރެޑިޓް ރޭޓިންއަށް ހެޔޮ ބަދަލުތައް އަންނާނެ ކަމަށް ބެލެވޭ ކަމަށްވެސް ބުނެފައިވެ އެވެ.