ބޮލީވުޑްގެ ޒުވާން ތަރި ސިދާންތު ޗަތުރަވެދީ ވަރުގަދަ އެކްޝަން ރޯލެއް ކުޅެފައިވާ އެކްޝަން ތުރިލާ "ޔުދުރާ" ގެ ވިލަންގެ ރޯލުން ވެސް އެކްޓަރު ރާގަވް ޖުޔަލް ބެލުންތެރިންނާ ބައްދަލު ކުރަން ތައްޔާރުވެއްޖެ އެވެ.
މިދިޔަ މަހުގެ ތެރޭގައި ދަރުމާ ޕްރޮޑަކްޝަން ރިލީޒްކުރި "ކިލް" އަކީ ވެސް އޭނަ ވަރަށް "ނުރައްކާތެރި" ވިލަންއެއްގެ ރޯލުން ފެނުނުު ފިލްމެކެވެ. އާންމުންގެ ތެރޭގައި ރާގަވް މަޝްހޫރުކަން ހޯދީ ނެށުންތެރިއެއްގެ ގޮތުގަ އެވެ. އެގޮތުން ނެށުމަށް ބިނާކޮށް ގެނެސްދީފައިވާ ޑައިރެކްޓަރު ރެމޯ ޑި ސޫޒާގެ އެނީބަޑީ ކޭން ޑާންސް (އޭބީސީޑީ) ގެ ދެވަނަ ބަޔާއި "ސްޓްރީޓް ޑާންސާ" ގައި ވެސް ރާގަވް މަސައްކަތްކޮށްފައިވެ އެވެ.
އަދި ސަލްމާން ޚާންގެ "ކިސީ ކާ ބާއީ ކިސީ ޖާން" ގެ ރޯލެއް ވެސް ރާގަވް ކުޅެފައިވެ އެވެ.
މިހާރު ގިނަ ފުރުސަތުތަކެއް ލިބެމުން އަންނަ ރާގަވް، ވިލަންއެއްގެ ރޯލު ދެވަނަ ފިލްމު "ޔުދުރާ" އަންނަ މަހުގެ 20 ގައި ސިނަމާތަކަށް ގެންނަން ނިންމާފައިވާ އިރު، މީގެ ޓްރެއިލާ ވެސް މިހާރު ވަނީ ދައްކާލައިފަ އެވެ. ފަރުހާން އަޚްތަރާއި ރިތޭޝް ސިދުވާނީގެ އެކްސަލް އެންޓަޓައިންމަންޓުން ޕްރޮޑިއުސްކޮށްފައިވާ މި ފިލްމުގެ ޑައިރެކްޓަރަކީ ކުރީގެ ބަތަލާ ސްރީދޭވީގެ 2017 ގެ ކްރައިމް ތުރިލާ "މޮމް" ގެނެސްދިން ރަވީ އުދިއަވަރެވެ.
ދެކުނުގެ މަޝްހޫރު ބަތަލާ މަލްވިކާ މޯހަނަން ބޮލީވުޑަށް ތައާރަފުވާ "ޔުދުރާ" ގެ ކާސްޓްގައި ރާމް ކަޕޫރް، ގަޖްރާޖް ރާއޯ، ރާޖް އަރުޖުން އަދި ޝިލްޕާ ޝުކްލާ ހިމެނެ އެވެ.