ސިނަމާލެ ބުރިޖަކީ ޗައިނާއާއި ރާއްޖެއާ ދެމެދު އޮންނަ ޒަމާންވީ ގުޅުމުގެ ރަމްޒެއް ކަމަށް ރައީސް ޑރ. މުޙައްމަދު މުއިއްޒު މިއަދު ވިދާޅުވެއްޖެ އެވެ.
ސިނަމާލެ ބުރިޖަށް ހަ އަހަރު ފުރުމާ ގުޅިގެން "އެކްސް"ގައި ކުރެއްވި ޕޯސްޓެއްގައި ރައީސް ވިދާޅުވީ ސިނަމާލެ ބްރިޖަކީ ހަމައެކަނި ދެ ރަށެއް ގުޅުވައިދޭ ފާލަމެއް ނޫން ކަމަށާއި އެއީ ރާއްޖެ އާއި ޗައިނާގެ ޒަމާންވީ ގާތް ގުޅުމުގެ ރަމްޒެއް ކަމަށެވެ.
އަދި ސިނަމާލެ ބުރިޖަކީ ރާއްޖެ އާއި ޗައިނާއިން ކަންކަމުގައި ގުޅިގެން ކުރިއަށްދިއުމާއި ދެ ގައުމުގެ ބަދަހިކަން ދައްކުވައިދޭ ހެއްކެއް ކަމަށާއި މި ބުރިޖަކީ ދެ ގައުމުގެ އެއްބާރުލުން ދިނުމުގެ ނިޝާނެއްގެ ގޮތުގައި އަންނަން އޮތް ޖީލުތަކަށް ވެސް ޚިދުމަތްކުރާނެ ތަނެއް ކަމަށްވެސް ރައީސް ވިދާޅުވި އެވެ.
ސިނަމާލެ ބުރިޖަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި ޗައިނާގެ ހިލޭ އެހީގެ ދަށުން ބިނާކުރި ބުރިޖެކެވެ. އެ ބްރިޖު ރަސްމީކޮށް އިފްތިތާހު ކުރީ 30 އޮގަސްޓު 2018ގަ އެވެ.