ރާއްޖޭގައި ނުކުޅެދުންތެރިކަން ހުންނަ ފަރާތްތަކަށް ޚާއްސަކޮށް ރިޒާވް ކޯޓާއެއް ހަމަޖައްސައި "އެމްޕަވަމަންޓް ފަންޑުގެ" ނަމުގައި ފަންޑެއް ގާއިމުކުރުމާ ގުޅޭ ގޮތުން މަޝްވަރާކޮށްފި އެވެ.
ސޯޝަލް އެންޑް ފެމިލީ މިނިސްޓްރީގެ ސްޓޭޓް މިނިސްޓަރު އަހުމަދް އާތިފް ދައުލަތުގެ މީޑިއާ، ޕީއެސްއެމްގައި ވިދާޅުވީ އިންޓަނޭޝަނަލް ބެސްޓް ޕްރެކްޓިސް އަށް ބަލާ އިރު، ނުވަތަ ބައިނަލްއަޤުވާމީ އެންމެ ރަނގަޅު ނިޒާމުތަކަށް ބަލާއިރު ކުންފުނިތަކުގައި ވަކި ޕަސަންޓޭޖެއްގެ ވަޒީފާތައް ހުންނަނީ ނުކުޅެދުންތެރިކަން ހުންނަ ފަރާތްތަކަށް ޚާއްސަ ވަޒީފާގެ ގޮތުގައި ކަނޑައަޅާ ކަމަށެވެ. އެހެން ނޫން ނަމަ އެ ވަޒީފާތަކަށް ޚަރަދުވާ މިންވަރު، ވަކި ފަންޑަކަށް ޖަމާވާހެން، އެ ޤައުމުތަކުގައި "އެމްޕަވަމަންޓް ފަންޑުގެ" ނަމުގައި ފަންޑެއް ކަނޑައަޅާކަމަށް ވެސް ވިދާޅުވި އެވެ.
އޭނަ ވިދާޅުވީ މިފަދަ ނިޒާމުތަކަކީ ރާއްޖޭގައި ޤާއިމުކުރެވިދާނެ ނިޒާމުތަކެއް ކަމަށާއި، މި ނިޒާމުތަކުގެ ތެރެއިން ދެމެހެއްޓެނިވި ފައިދާތައް ނުކުޅެދުންތެރިކަން ހުންނަ ފަރާތްތަކަށް ލިއްބައި ދިނުން މުހިންމު ކަމަށެވެ.
އާތިފު ވިދާޅުވީ ޓެކްސް ނިޒާމުގެ ތެރެއިން ޑަބަލް ޑިޑަކްޝަން ތަޢާރަފު ކުރުމަކީ ވެސް ނުކުޅެދުންތެރިކަން ހުންނަ ފަރާތްތަކަށް ވަޒީފާ ދޭ ފަރާތްތައް އެކަމަށް ޝައުގުވެރިވާނެ، އަދި ނުކުޅެދުންތެރިކަން ހުންނަ ފަރާތްތަކަށް ވެސް އެކި ދާއިރާތަކުން ވަޒީފާގެ ފުރުސަތުތައް ހޯދުމުގައި ވެސް ވަރަށް ބޮޑަށް މަންފާ ކުރާނެ ކަމެއް ކަމަށެވެ.
އެހެންވެ ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފަހި ފުރުސަތުތަކެއް ހޯދައި ދިނުމަށް ސޯޝަލް އެންޑް ފެމިލީ މިނިސްޓްރީން މަސައްކަތް ކުރަމުން އަންނަ އިރު، އެމްޕަވަމެންޓް ފަންޑު ޤާއިމްކުރުމާއި، ޓެކްސް ނިޒާމަށް ބަދަލުތައް ގެނައުމާ ގުޅޭ ގޮތުން ކަމާ ގުޅުންހުރި ފަރާތްތަކާ މަޝްވަރާކުރަމުން އަންނަ ކަމަށް ވިދާޅުވި އެވެ.
އާތިފު ވިދާޅުވީ މިފަދަ ނިޒާމުތަކެއް ކަނޑައެޅިއްޖެ ނަމަ މިހާރު ވަޒީފާއަށް އެދިފައިވާ ނުކުޅެދުންތެރިކަން ހުންނަ ފަރާތްތަކުގެ ދަފުތަރުގެ ވެއިޓްލިސްޓްގައި ތިބި ފަރާތްތަކަށް ވަޒީފާގެ ފުރުޞަތުތައް ފަހިކޮށްދީ، މުޖުތަމަޢުގައި އެ ފަރާތްތަކުގެ ބައިވެރިވުން އިތުރުކުރުމަށް މަގުފަހިވެގެންދާނެ ކަމަށެވެ.