ސްޓާ ޕްލަސްގެ ސިލްސިލާ "އަނޫޕަމާ" ގައި ސުދާންޝޫ ޕާންޑޭ ކުޅެމުން އައި ވަންރާޖް ޝާގެ ރޯލު އޭނަ ދޫކޮށްލަން ނިންމުމާ ގުޅިގެން އެ ރޯލަށް އާ އެކްޓަރަކު މިހާރު ހޯދާފައިވާ މީޑިއާތަކުން ބުނެފި އެވެ.
އިންޑިއާ ފޯރަމް އިން ބުނީ އިންޑިއާގެ އެންމެ މަގުބޫލުގެ ސިލްސިލާގައި ވަންރާޖްގެ ކެރެކްޓާ ދެން ކުޅޭނީ މީގެ ކުރިން ވެސް ގިނަ ޓީވީ ސިލްސިލާތަކުން ފެނިފައިވާ ޕަންކިތު ތައްކަރު، 43، ކަމަށެވެ. އޭނަ އެންމެ ފަހުން ކުޅުނު ސިލްސިލާ އަކީ މި އަހަރުގެ ފެބްރުއަރީގައި ސޮނީ ޓީވީން ނިންމާލި "ބަރުސާތޭ: މޯސަމް ޕިޔާރު ކާ" އިންނެވެ.
ޕަންކިތު ކުޅެފައިވާ ސިލްސިލާތަކުގެ ތެރޭގައި "ކަބީ ސޯތަން ކަބީ ސަހޭލީ"، "ތުމް ބިން ޖައޮ ކަހާ"، "ދިލް މިލް ގަޔޭ"، "ތުޖު ސެ ހެ ރާބްތާ" އަދި "ޖަނަމް ޖަނަމް ކާ ސާތު" ހިމެނެ އެވެ.
ރިޕޯޓްތައް ބުނާ ގޮތުން "އަނޫޕަމާ" ގެ ކާސްޓާއި ކްރޫއާ ޕަންކިތު ވަރަށް އަވަހަށް ގުޅޭނެ އެވެ. އަދި ވަރަށް އަވަހަށް އޭނަ ސިލްސިލާ އިން ފެންނަން ފަށާނެ އެވެ.
ހަތަރު އަހަރު ވަންދެން ވަންރާޖްގެ ރޯލު ކުޅުމަށް ފަހު ސުދާންޝޫ އެ ސިލްސިލާ އިން ވަކިވާން ނިންމިކަން އިއުލާންކުރީ މީގެ ދެ ދުވަސް ކުރިން އިންސްޓަގްރާމްގަ އެވެ. ބައެއް މީޑިއާތަކުން ބުނީ ސިލްސިލާ އިން ކުއްލި ގޮތަކަށް ވަކިވާން ނިންމީ، ވަކިކުރަން އުޅޭތީ އެވެ.
ސުދާންޝޫ "އަނޫޕަމާ" އިން ވަކިކުރަން ނިންމީ އޭނަ މިހާރު ގޮތްގަނޑު ބޮޑުކޮށް އަދި ކާސްޓާއި ކްރޫއާ އޮންނަން ޖެހޭ ގުޅުން ވެސް މި ފަހުން ބާއްވަމުން ނުދާތީ އެކީގައި މަސައްކަތްކުރަން ދަތިވެފައިވާތީ އެވެ.
"އަނޫޕަމާ" އަކީ ޖުލައި 13، 2020 އިން ފެށިގެން ދައްކަމުން އަންނަ ސިލްސިލާއެކެވެ. އެވެ. މިހާތަނަށް 1،370 އަށް ވުރެ ގިނަ އެޕިސޯޑް ދައްކާފައިވާ ސިލްސިލާގެ ޓައިޓްލް ރޯލު ކުޅެނީ ރުޕާލީ ގަންގޫލީ އެވެ.