އަންނަ މަހު ބާއްވާ ސްރީ ލަންކާގެ ރިޔާސީ އިންތިހާބުގައި ވާދަކުރައްވާ މިހާރުގެ ރައީސް ރަނިލް ވިކްރަމަސިންހަގެ ކެންޑިޑޭސީން ބާތިލުކޮށް ދޭން އެދި އަމިއްލަ ފަރާތަކުން ސުޕްރީމް ކޯޓަށް ހުށަހެޅި ޕެޓިޝަނަކާ ގުޅިގެން ކޯޓަށް ބޮޑު ފީއެއް ދައްކަން ޖެހިއްޖެ އެވެ.
ކޯޓުން ބުނީ ޕެޓިޝަން ހުށަހެޅީ ސައްހަ ނޫން މައުލޫމާތުތަކެއްގެ މައްޗަށް ބިނާކޮށް ކަމަށާއި އެއީ ގާނޫނުއަސާސީގެ 92 ވަނަ މާއްދާއާ ވެސް ހިލާފު ކަމެއް ކަމަށެވެ. އެހެންވެ ޕެޓިޝަން ބަލައިނުގަނެ ބޭރުކޮށްލައި، ޕެޓިޝަން ހުށަހެޅި ފަރާތުން ކޯޓް ފީއެއްގެ ގޮތުގައި 50،000 ރުޕީސް ދައްކަން އަމުރުކޮށްފައިވެ އެވެ.
ރަނިލްގެ ކެންޑިޑޭސީ ބާތިލުކޮށް ދޭން ހުށަހެޅީ އިންސްޕެކްޓަ ޖެނެރަލް އޮފް ޕޮލިސްގެ މަގާމަށް ވަގުތީ ގޮތުން ބޭފުޅަކު އައްޔަންކޮށްފައި ނުވާ ކަމަށާއި ސުޕްރީމް ކޯޓަށް އައްޔަންކުރަން ޖެހޭ ފަނޑިޔާރު އައްޔަން ނުކުރުމުގެ އިތުރަށް އިސްތިއުނާފީ ކޯޓަށް ފަނޑިޔާރު އައްޔަން ކުރަން ވެސް ވެރިކަމުގައި ހުންވައިގެން ރަނިލް ނުކުޅެދިފައިވާ ކަމަށް ބުނެ އެވެ.
ލަންކާގެ ރިޔާސީ އިންތިހާބު އޮންނާނީ އަންނަ މަހުގެ 21 ގަ އެވެ. މި އިންތިހާބުގައި 38 ކެންޑިޑޭޓުން ވާދަކުރައްވާ އިރު، ރަނިލް ވާދަކުރައްވަނީ އަމިއްލަ ގޮތުންނެވެ.
ލަންކާގެ އެންމެ ނުފޫޒު ގަދަ ސިޔާސީ ލީޑަރުންގެ ތެރޭގައި ހިމެނިވަޑައިގަންނަވާ ރަނިލް ލަންކާގެ ރައީސް ކަމަށް އައްޔަންކުރީ 2022 ގަ އެވެ. އެއީ ކުރިން އެ މަގާމުގައި ހުންނެވި ގޮޓަބަޔާ ރާޖަޕަކްސާ ޕްރެޝަރުތަކާ ހެދި އިސްތިއުފާ ދެއްވުމާ ގުޅިގެންނެވެ. މިހާރު އުމުރުން 75 އަހަރުގެ ރަނިލް އަކީ ލަންކާގެ ބޮޑުވަޒީރުކަން ހަ ފަހަރެއްގެ މަތިން ކުރައްވާފައިވާ ބޭފުޅެކެވެ.
އޭނަ ކުރިން ޑިފެންސް މިނިސްޓަރުކަމާއި ފިނޭންސް މިނިސްޓަރުކަމާއި ޓެކްނޮލޮޖީ މިނިސްޓަރުކަމުގެ އިތުރުން ސޯޝަލް އެމްޕަވަމަންޓް މިނިސްޓަރު ވެސް ކުރެއްވި އެވެ.