ރާއްޖެއަށް މަސްތުވާތަކެތި އެތެރެކުރި މެލޭޝިއާ ދެމީހެއްގެ ބަންދު މުއްދަތު ޖަހައިފިއެވެ.
މި މައްސަލައިގައި ހައްޔަރު ކޮށްފައިވަނީ މެލޭޝިއާއަށް ނިސްބަތްވާ އުމުރުން 44 އަހަރު އަދި 41 އަހަރުގެ ފިރިހެނެކެވެ. މި މީހުންގެ މައްޗަށް ކުރަނީ ރާއްޖެއަށް މަސްތުވާތަކެތި އެތެރެކޮށް އެތަކެތީގެ ވިޔަފާރި ކުރިކަމުގެ ތުހުމަތެވެ.
މި ދެމީހުންގެ ބަންދު މުއްދަތު ޖެހުމަށް ކްރިމިނަލް ކޯޓަށް އިއްޔެ ހާޒިރު ކުރުމަށް އެ ކޯޓުން މި ދެމީހުންގެ ބަންދަށް 5 ދުވަސް ދީފައިވެއެވެ.
މި މީހުންގެ ބަންދު އަމުރުގައި ބުނެފައިވަނި ވަކީލަކު ހަމަޖެއްސިފައިވީނަމަވެސް ވަކީލާއި ބައްދަލުވެ ވާހަކަ ދެއްކިފައި ނުވާ ކަމަށެވެ. އަދި މެލޭޝިއާ އެމްބަސީގެ ބޭފުޅަކާ ވާހަކަދައްކަން ބޭނުންވާތީ، އެކަމަށް މި މީހުން ކޯޓުގައި އެދިފައިވެއެވެ.
އެހެންކަމުން ކޯޓުން މި މީހުންގެ ބަންދަށް ފަސް ދުވަހުގެ މުއްދަތެއް ދީފައިވަނީ ވަކީލާއި ބައްދަލުކޮށް ވާހަކަ ދެއްކުމުގެ ފުރުސަތު ދިނުމުގެ ގޮތުންނެވެ.